大班樓(久違了的滋味)

5年前在大班樓吃過晚飯後, 大班樓瞬間已成為超級長龍店, 訂坐往往要數個星期前, 令我們再提不起勁去幫襯, 今年生日預早訂了枱, 又可再度品嚐久違了的滋味.

============================================================================================

九層塔甜醋醃漬小茄配香茅甜梨($98), 車厘茄巳去外皮, 入口清甜多汁全無草青味, 雪梨清爽又帶有獨特香甜味道, 一道非常開胃的頭盤. 

櫻花蝦煙燻乳鴿鬆生菜包($138), 乳鴿鬆煙燻味濃, 櫻花蝦香脆惹味, 味道互相輝映, 滋味的小吃.

古法金錢雞配饅頭($192), 須要預訂並設定於7:40分出爐, 火候恰到好處, 雞肝入口軟糯甘香, 冰肉加馬蹄能中和味雷及增加口感, 饅頭超鬆脆, 精釆的演繹.

雞油花雕蒸大紅蟹配陳村粉(20兩 $1,300), 大紅蟹肉飽滿充實, 肉質細緻勁鮮味, 雞油花雕汁調製得非常出色, 配又薄又滑蘸滿雞油花雕汁的陳村粉, 滿口甘香, 鮮味與酒香, 味道層次分明, 優質高水準, 無懈可擊的美味.

馬友鹹魚煎肉餅($128), 煎得外皮香脆並非一般以油炸可媲美, 肉質爽彈有肉汁, 鹹香惹味, 配鮮甜陳醋能令味道更佳, 滋味無窮.

子薑雪糕($45), 香滑帶清新薑味, 似有如無的薑溶, 十足分子料理中的薑汁撞奶, 十分正斗.