安半 - 隱蔽日本私房菜

位於銅鑼灣商厦樓上舖, 地點十分隱蔽嘅一間日本私房菜(安半), 由日本人經營,  老闆兼大廚安部隆孝先生作風低調但有性格, 不願上鏡, 識講小小廣東話, 為人幾風趣幽默. 安半以小店形式經營, 衹得拾零個位, 不設餐牌, 衹做晚市Omakase每位收$750,  菜式隨季節而定, 用料超級新鮮同優質, 出品一絲不苟, 今晚菜式非常豐富, 超級大滿足.  

開放式廚房, 坐吧頭位一目了然.

  

非常精緻嘅比目魚筷子坐, 餐紙乃老闆安部先生自己設計, 四季都唔同, 有心思. 

食日本菜, 最夾就係飲凍清酒(每杯$100), 清香唔梗易入喉, 每人 Encore 多一杯, 原來竹筒做嘅杯可保持冷度. 

 

鹽辛魷魚 - 鹹鮮香惹味, 送酒一流.

 

涼伴韭菜 - 開胃小菜.

  

煙鴨胸 - 肉質香嫩軟熟.

  

烤魔鬼魚 - 香口好味嘅小食.

  

醬豬肝 - 入口甘香, 十分和味.

  

紫菜秋葵蓉 - 非常特別嘅小菜, 入口滑溜溜, 香味獨特, 可以清清味雷.

 

  

雜錦刺身 - 材料超優質, 香甜鮮味無窮, 食食吓老闆仲醒多一大片Toro比我地, Toro入口甘香融化, 回甘味歷久不散, 人間美味.



 

海膽刺身 - 新鮮超大片, 甘香嫩滑, 齒甲留香. 

  

蓮藕雞肉丸煮 - 蓮藕爽口, 雞肉丸軟熟香糯, 配搭得而.

  

烤銀雪魚 - 選用正宗日本銀雪魚, 嫰滑甘香油份充足, 高質素.

  

蘿蔔煮銀雪魚頭 - 銀雪魚頭炆煮得非常入味, 蘿蔔勁甜美.

  

烤日本和牛 - 五成熟火候恰到好處, 入口甘香鬆化, 肉汁豐膄, 配合伴碟嘅南瓜蓉沙律可去油膩, 天下無敵嘅滋味.  

  

漬物 - 自家醃製, 勁爽脆. 

  

五目雞肉飯 - 口感豐富好味道. 




  

雪場蟹腳麵豉湯 - 用雪場蟹腳熬湯認真夠豪, 湯底香鮮味濃郁, 一滴不留.

熊本蜜瓜 - 日本溫室蜜瓜, 香腍甜美多汁, 無懈可擊


瀏覽人數 :