曼谷(紅衫軍)自遊行2010

每年都會去曼谷自遊行, 今年有D特別, 就係9個月前已經訂了AirAsia超平機票每張HKD198, 仲訂埋Four Seasons Hotel. 但出發前先知紅衫軍將會有集會同大遊行, 保安局巳發出紅色預警, 香港旅遊業協會都建議取消行程. 我地都取消左酒店, 到出發嗰日先决定去, 總算有驚無險. 今年泰銖又升左好多, 舊年呢個時期仲係4.61, 今年就由4.04換到4.16(都係林真香最抵), 但平均都要4.1. 今年起已經決定唔食魚翅喇(因為D人攞魚翅時對D鯨鯊好殘忍), 所以今次冇去曼谷魚翅, 反而有機會試D新野, 就係泰北菜嘅Manna喇. 今次3日2夜行程簡單同冇寄倉行理, 每人攞個袋就上機, 所以唔帶部Olympus相機, 衹用新買嘅Canon S90, 輕便快捷又好用.

今次喺2號客運大樓check-in, 喺度食飽飽先上機, 上海食物做得幾有質素.

第一次搭Air Asia, 原來都唔錯, 機仔細細(A320) 都好穩定.

我地每人坐3個位, 好舒服咁瞓左一陣, 醒左就order個杯麵食(Baht60), 幾爽引.

原來Four Seasons 嘅個人護理用品係法國牌子 L'OCCTANE, 認真正.

到左酒店因為太夜冇出去揾野食, call左 room service.

蟹肉春卷(Baht260), 夠香脆, 入面仲有好多蟹肉做餡.

奄列蝦仁炒河粉(Baht280), 加D辣椒粉同魚露一齊食, 香口好味.

Welcome Fruit - 杧果同梨

煮泰國菜常用嘅香料喺齊度.

酒店自助早餐好豐富, D果汁仲好多款式好好飲, 原來每位收Baht780, 我地當然包埋啦.

仲有第度早餐好少見嘅即做三文魚/火腿Egg Benedict.

自選蛋白奄列, 夠健康, 唯冇嘜蛋味所以冇咁香.

泰國水果多又正.

食完早餐行吓酒店影吓相, 呢幅畫係全人手一筆一筆劃上去架.

之後就更係要拜吓四面佛啦, 人少少就拜都拜得舒服好多.

好少見Central World 對出馬路冇嘜車.

Central World商場內都好少人.

行完Central World 就沿行人天橋到 Siam Paragon, 行左一陣就醫醫個肚. 揀左食傳統泰北菜嘅 Manna, 沖哥介紹有九折.

Manna-Mango Tango(Baht100)比較普通 + Kiss(Baht100)用荔枝加菠蘿汁, 好好飲.

Manna-招牌沙律(Baht300)-其實係海鮮沙律, 個汁好特別, 加左D椰絲同勁香辣, 餸飯一流.

Manna-青胡椒炒蟹肉(Baht280) - 蟹肉軟熟鮮甜爽惹味.

 

Manna-炒泰北時菜(Baht140) - 好似喺沙巴食過薯仔菜, 幾特別.

曼谷嘅中午真係好熱, 最好就係返酒店游吓水架啦.

服務真一流, 游左一陣水就送來一件冰凍大西瓜消暑, 多汁透心涼.

過左一陣, 又有冰涼鮮橙, 真細心.

游左一陣水, 夠鐘去做SPA, 一做兩粒鐘, 梗係要打打底先. 想去Pennisula Plaza 食呀蘇推介Provence嘅魚蛋粉, 點知去到佢話冇得賣. 唯有去 Gayson 2樓嗰間分店.

Provence-濃湯魚蛋粉(Baht125), 濃湯不太鹹, 魚蛋爽彈有魚味.

Provence-紅湯海鮮粉(Baht125), 材料豐富, 湯底酸甜醒胃.

BTS Ratchadamri站, 坐4個站就到 Asok喇.

Urban Retreat(Baht1,900)-舊年去過總店試, 感覺一流, 今年去佢地喺Asok站嘅新店一樣咁掂, 仲有 discount添.

做完SPA想去唐人街行吓, 沿途交通暢順好快就到, 連唐人街都冇平時咁熱鬧.

呢間和成豐4年前黎食過, 好正好回味. 所以今睌再黎食番4年前嘅菜式.

和成豐-炭燒大頭蝦(Baht600), 超大Size, 炭烤火喉足, 蝦爽鮮味啖啖肉, 蝦膏軟滑甘香, 勁正.

和成豐-鵝掌煲仔麵(Baht400), 鵝掌軟腍香口, 配料同麵都好入味, 滋味無窮.

和成豐-炒通菜(Baht140), 惹味又夠獲氣.

留肚返酒店食宵夜, 下午喺 Siam Paragon 個 Supermarket 行過見到D淨花蟹拑好鬼給引, 買定黎做宵夜大餐.

無敵大蟹拑冬蔭海鮮麵, 好豪呀!

今朝早餐揀左坐户外, 環境靚絕, 仲有好多錦鯉倍住你食.

食完早餐就喺泳池度 Hea 吓, 好爽引.

原本今日直出機場冇行程, 但知道D紅衫軍唔會攪機場同遊客區, 所以改左 1:30PM 先由酒店出機場. 可以有時間出去行吓.

行過Central World 都仲係非常平靜.

過左一陣(大約 11:45AM)就見到一大批紅衫軍集住四面佛路邊旁, 準備向集會區”潘發橋”出發.

浩浩蕩蕩出發時, 仲邊行邊叫口號好有氣勢, 攪到我都有D緊張.

呢間Saboten吉列專門店 喺 Central World 入邊嘅 Isaten 百貨內, 舊年試過唔錯. 出品拍得住 Tonkichi, 但價錢就平一半.

Saboten-吉列三文魚定食(Baht330), 皮薄香脆唔肥膩, 三文魚軟熟鮮味, 大蝦鮮香啖啖肉, 蟹肉薯餅香腍好味.

Saboten-紫蘇梅豬柳卷定食(Baht300), 紫蘇梅汁醒胃夠特別, 豬柳肉嫩有肉汁, 冇得彈.

Saboten-綠茶雪糕, 茶味夠濃又唔太甜.

食完Lunch返酒店坐車出機場, 酒店今日做緊 Sunday Brunch, 好多好多野食.

出機場嘅交通非常暢順, 25分鍾就到. 大把時間淨, 可以去吓地面嘅 Local FoodCourt 開餐, 好多地道食品, 形式同MBK差不多, 要先換 coupon.

燒鵝撈麵(Baht55), 去骨燒鵝腍香入味, 確係平靚正.

泰式地道撈河(Baht40), 因為祇有泰文所以唔知叫嘜名, 有雞肉豆腐同好多醬汁配料, 非常地道同特別.

呢個神象係曼谷機場嘅地標, 離境時一定見到.

Air Asia 原來係泰國當地嘅航空公司.

戰利品, 原本仲有兩枝喺泰國先買得到嘅牙膏. 可惜原來帶唔到上機, 比海關充公左, 好鬼肉赤呀.

瀏覽人數 :