2012年4月5日 星期四

伊豆5天自駕遊(Day 2)

Day 2 : (沼津魚市場 - 江間草莓園 - 修善寺 - 西伊豆 - 土肥 - 戀人岬 - 旅人岬 - 御宿きむらや旅館「つわぶき亭」)






酒店房間景觀開揚, 仲可以睇到富士山.



Check-out 完第一站先到沼津魚市場.




沼津魚市場早上6:00~7:00係交易競投時間, 我地去到已經8:20, 當然收晒檔啦, 只可以睇參考圖片, 不過呢個魚市場超級乾淨, 一D魚腥味都無, 真佩服.



沼津港嘅大型展望水門先, 水門闊40M, 高約9.3M, 重406噸, 乃全日本最大水門.


 泊滿魚船嘅沼津港口.



魚市場附近大部份食店9:00~10:00點先開, 途中見到呢間"もすび屋"未夠9:00已經開左, 一於入內朝食一番.



店子小小衹有2人經營, 菜式全部都寫喺牆上, 一目了然, 見到有朝定食, 當然係首選啦.



燒地魚朝定食(780) - 燒地魚一夜乾乃伊豆必食名物, 熱辣辣皮脆內軟, 鹹香好味道, 一枝棒.



鯖魚味噌煮朝定食(780) - 新鮮好味, 餸飯一流.



即製蛋卷 - 軟熟甜甜地, 蛋香味濃.



納豆 - 朝食首選, 加D豉油用筷子攪到起絲便可食用, 口感滑潺潺, 營養豐富, 撈飯好和味.



池魚刺身 - Tartarki 造法, 駿河灣出產嘅池魚超新鮮, 魚肉入口爽滑鮮甜, 人間美味.



食飽飽後行吓魚市場附近一帶店舖, 有好多海產手信.




呢間最大最吸引, 好多伊豆名物"金目鯛一夜乾"在製造中.



乾貨濕貨地道產品樣樣齊, 入左少少貨就走人啦.


新鮮館乃沼津魚市場附近嘅一個大廣場, 內有好多地道產品店及食店.



伊豆天城山出產新鮮山葵(Wasabi), 新鮮到連葉嘅都係首次見.



呢間炸海鮮店, 專賣駿河灣海鮮產. 好多魚仔蝦仔.



吞那魚頭汁煮, 見個樣都知好味.



大豐收後就離開沼津魚市場, Set 好 GPS 向下一站出發.



江間草莓園, 入溫室摘草莓, 每人1,000 半小時內任摘任食, 我地有九折割引卷 .


有專車帶路2分鍾就到, 農夫巳在果園前恭候.




溫室內有好多草莓, 紅彤彤色澤鮮豔奪目, 香甜味美多汁, 食左卄幾粒, 番晒本啦.



江間草莓園停車場附近已經有好多櫻花樹, 一於影番夠本.



沿下一站"修善寺"途中, 再見到另一櫻花樹群, 又可以影一餐.



樹上嘅櫻花盛開, 又大又密, 非常燦爛. 



好快已到修善寺了.



修善寺梅園, 沿山路上可以行到去善修寺, 我地當然唔會咁樣行啦, 冇嘜野睇就走人.


 
修善寺梅園, 沿山路上可以行到去善修寺, 我地當然唔會咁樣行啦, 冇嘜野睇就走人.



修善寺溫泉街, 小溪同紅色嘅橋樑好有古代氣色, 對面就係修善寺正門.


修善寺好有古都嘅風情, 建於平安時代初期807年, 古木建築群令人有寧靜同舒服嘅感覺.



沿修善寺溫泉街一帶行吓, 好快就到竹林小徑.



竹林小徑嘅環境非常清優.



午飯時間又到, 今次一心要食吓呢度嘅地產名物, 生山葵同蕎麥麵, 天城山水質清澈乾淨冰涼, 最適合山葵生長. 書本推介左呢間"独鈷そぱ大户"蕎麥麵專門店, 無介紹錯.



店內祗售兩款蕎麥麵食品, 凍食或熱食, 圖文並茂好簡單.


修善寺湯蕎麥麵(1,260) - 大和芋(山藥)入口好潤喉, 熱湯麵清香味美令人舒服, 新鮮地道南瓜芋頭山葵葉等蔬菜都清甜可口, 勁正. 



修善寺凍加大蕎麥麵(1,460) - 原枝新鮮連葉嘅生山葵(Wasabi)一同上, 自己即磨即食份外爽引, 新鮮生山葵味道無咁梗, 仲多左陣陣獨特嘅清爽木香氣味, 好食又好玩. 伴凍蕎麥麵同大和芋一齊食, 再加上青蔥同醬油, 配搭天衣無縫, 無敵嘅超人氣必定名物.



修善寺凍加大蕎麥麵(1,460) - 原枝新鮮連葉嘅生山葵(Wasabi)一同上, 自己即磨即食份外爽引, 新鮮生山葵味道無咁梗, 仲多左陣陣獨特嘅清爽木香氣味, 好食又好玩. 伴凍蕎麥麵同大和芋一齊食, 再加上青蔥同醬油, 配搭天衣無縫, 無敵嘅超人氣必定名物.



戀人岬 - 位於伊豆西部土肥, 居高臨下視野開揚, 可以見到遠遠嘅富士山, 可惜今日有霧睇唔到. 衹可以喺度敲3吓響聲立下永恆誓約.



呢處喺伊豆最西邊, 眺望一片無際嘅海洋同駿河灣景致. 忽然天上烏雲密報想落雨, 無得睇黃昏日落嘅絕景, 要走人啦.



去酒店途中雨過天晴後, 曙光初現, 喺"旅人岬"停底欣賞吓, 認真正.



御宿きむらや旅館「つわぶき亭」(41,580)一泊兩食, (户田市人氣館世界最大級の高足ガニ), 絕對物有所值.

一入酒店門口已被靚絕嘅觀景所吸引住.



御宿きむらや旅館「つわぶき亭」- Upgrade 左間大房比我地, 又大又靚仲有駿河灣海景.


御宿きむらや旅館「つわぶき亭」- Upgrade 左間大房比我地, 又大又靚仲有駿河灣海景.


有一識講普通話嘅店員向我地報料話今日可以免費安排私人貸切風呂, 仲幫我地喺晚餐前浸浴同得時可以欣賞黃昏日落嘅絕景, 真窩心.


黃昏日落, 如果無霧可以睇埋富士山, 咁就仲正.



伊豆地酒(純米吟釀), 係食溫泉料理嘅最佳配搭.



御宿きむらや旅館「つわぶき亭」- "浜の舞"全13品の磯會席料理, 超級豐富. 


先付 - 清爽.


八寸 - 青豆煮 + 山菜漬 + 榮螺燒 + 地魚唐揚.



竹狹魚壽司 - 清新開胃.



剌身舟盛 - 陣容頂盛, 鯛魚姿造(鮮甜軟熟, 口感清新) + 甘蝦(膏甘香,肉鮮甜,蝦子爽口) + 魷魚(爽滑夾鮮味) + 榮螺(鮮甜爽脆彈牙) + 地魚苗(口感軟滑, 海洋味充足) + 吞那魚腩(甘香肥美, 入口溶化, 齒甲留香) = 天下無敵嘅味道 .



煮物 - 蔬菜煮鯛魚, 魚肉新鮮軟熟, 美味.



燒物 - 鹽燒金目鯛, 皮脆肉鮮爽, 連骨都食埋, 勁滋味.



燒物 - 燒地蝦, 可以原隻拍入口, 香口鮮味.



陶阪燒 - 蔬菜帆立貝陶阪燒+高足蟹腳, 太多野食令帆立貝Over Cook左, 但同樣清新鮮甜.



地產地消, 巨型高足蟹生長於深海300米水底, 衹喺呢度沼津港户田市先食到, 曰本其他地區都無得食. 為左佢先至黎呢度住架炸. 過呎長嘅高足蟹腳一屈開就會原條蟹肉拉出黎好易食, 蟹肉鮮甜清爽, 蟹身反而無想象中咁多肉, 蟹膏就似福井嘅越前蟹膏一樣, 甘香味濃郁, 超級精釆.



地產地消, 巨型高足蟹生長於深海300米水底, 衹喺呢度沼津港户田市先食到, 曰本其他地區都無得食. 為左佢先至黎呢度住架炸. 過呎長嘅高足蟹腳一屈開就會原條蟹肉拉出黎好易食, 蟹肉鮮甜清爽, 蟹身反而無想象中咁多肉, 蟹膏就似福井嘅越前蟹膏一樣, 甘香味濃郁, 超級精釆.



大蜆味噌汁 - 用大量海蜆熬湯, 鮮味無比.



漬物 - 超爽脆.


甜品 - 抹茶布甸 + 菠蘿 + 提子 + 芝士蛋糕.




食飽後想到大浴場浸浸, 去到見到家族風呂無人用, 我地又可以2人同時浸浴, 超爽引. 浸完後行去酒店大堂睇吓野.



酒店售賣店 - 大量地道產物賣, 買左山葵東菇同酸梅乾.



浸完溫泉返回酒店房間, 床鋪巳經預備好, 大覺瞓到天光.



瀏覽人數 :
無料カウンター

4 則留言:

  1. 請問這間溫泉旅館有冇多些資料(中文名或英文名或地址),在綱上找不到資料,謝謝

    回覆刪除
  2. 御宿きむらや旅館「つわぶき亭」現在的中文名是西伊豆今宵湯屋, 可查閱下列綱址 : http://koyoionsen.com/nishiizu/index.html

    回覆刪除
  3. 上了jalan查到這旅館,但找不到高足蟹的住宿方案(慘慘😢)

    回覆刪除
  4. 因為高足蟹是期間限定的.

    回覆刪除

Related Posts Plugin for WordPress, Blogger...