沙巴4天潛水自遊行 (I)

今次係第二次去沙巴, 上次去巳經喺七年前, 今個復活節突然想去潛吓水, 可惜一早已冇機位, 唯有平日去, 4日3夜早晚返玩足4日, 巳經係一個好 Hea好簡單嘅陽光海灘之旅. 今次仲揀左海洋公園內一個島(Pulau Gaya), 住左一晚水中屋(Water Bungalow), 露台有條樓梯直落大海好爽癮, 仲可以喺露台食早餐, 好有Privacy. 美人魚島更加係水清沙幼嘅人間天堂, 好似去左馬爾代夫咁. 另外喺沙巴食海鮮認真平靚正, 今次食足3晚海鮮餐, 每餐都超豐富大滿足, 仲食埋香港少見嘅椰子蟹,海老鼠班同1呎長游水老虎蝦. 亞庇嘅黃昏日落景色真係靚絕, 見到個鹹蛋黃慢慢消失於水平線上. 呢4日黎都陽光非常充沛, 用左SPF50太陽油照樣曬到變成朱古力色人.

DAY 1 香港 - 亞庇 - Gayana Eco Resort

今次馬幣滙率為 RM1=HKD2.5, 上次(七年前)就兌 HKD2.13

祇有港龍機先可以有早去晚返嘅好時間.

港龍飛機餐, OK啦.

出左機場第一時間飛啲去碼頭(Jesselton Point), 10分鐘就到.

碼頭內有 Gayana Eco Resort 嘅專用counter No.10, 仲會帶你去專用侯船室.

Check-In 完行左一陣, 12:30 就上船出發.

15分鐘就到啦.

D 水都幾清, 可以睇到水底嘅珊瑚.

酒店房間寬敞簡潔, 仲有露台條樓梯直落大海, 浮潛就一流, 可惜中午時分D水唔係好清, 朝早就正好多.

午餐就喺池邊餐廳Macac食地道馬來食品, 仲有無敵大海景送飯.

  

Macac - 沙爹雞肉串RM28, 雞肉香口有肉味同質感, 仲好有炭燒風味, 沙爹醬更加一流, 用蝦片同好精緻嘅飯粒蘸黎食都好好味.

Macac - 咖哩叻沙蝦麵RM32, 湯底香濃, 辣得好醒神.

Infinity Pool - 右邊就係我地住嘅 Ocean Villa 喇.

下午就喺私人露台曬吓太陽 Hea 吓,  黃昏時份先出去行吓.

黃昏時份有 Happy Hour, 餐廳二樓會有免費飲品同小食供應, 環境好Free好 relax.

晚餐在中式餐廳Alu Alu, 食海鮮大餐.

游水海鮮種類好多, 明碼實價(當然比市中心嘅餐廳貴D啦).

Alu Alu - 涼伴啦啦螺片(RM40/1kg), 啦啦螺燙一燙就起片, 再用泰式酸辣汁撈一撈, 螺肉外爽內軟.

Alu Alu - 椒鹽瀨尿蝦(RM72/600g), 兩大隻, 椒鹽味不太濃, 肉質軟熟鮮味仲有膏.

Alu Alu - 蒜蓉炒樹仔菜(RM15), 爽脆嘅地道沙巴時菜.

Alu Alu - 濕奶油老虎蝦(RM120/2隻), 嗰汁有D似上湯牛油焗, 超大老虎蝦肉雪白, 爽彈鮮味, 每人一隻好滿足.

Alu Alu - 楊州炒飯(RM18), 沙巴嘅楊州炒飯原來就係海鮮炒飯, 炒得幾有水準.

Alu Alu - 椰汁布甸(RM18), 唔太甜, 有椰子同班蘭葉嘅香味.

食完晚飯, 漫步返房間, 途中見到24小時開放嘅泳池.



DAY 2(上) - Gayana Resort - Shangri-la's Tanjung Aru Resort

朝早6點就起身睇日出, 不過被前排嘅屋阻住. 太陽照落Resort, 變成金黃色.

 

Book左 7點喺露台食早餐, 用專船送餐呢招幾特別.

豐富早餐 + 環境靚 + 寧靜 + 高私隱度 = 絕對無敵.

留番D麵包可以餵吓魚, 早上D水又淺又清, 可以見到好多魚架.

朝早9:00點Resort安排左餵大魚節目, D魚好大條同好雀躍.

跟住坐半分鍾船去餵大龍躉, 原來個海好多水母.

成個人咁大條嘅花尾躉, 個口好大架, 會沖上黎食魚仔,我都成身濕晒, 仲驚佢搭埋我部相機添.

Recreation/Dive Center有浮潛用具免費借用, 但我地帶左私伙用俱呢.

尋日下午浮潛過但D水好渾濁冇野睇, 今朝就清左好多同見到好多魚.

隻紫色水母幾特別, 仲游得好快.

沿樓睇落去浮潛啦.

龍船(Moon Wrasse) 同鸚鵡魚(Parrotfish)

海葵(Anemone) 同小丑(ClownFish) 係好拍擋.

好少見嘅高射炮

 

神像(Moorish Idol)

Gaint Trevally / Jack Fish

水母(Jelly Fish)

海膽(Sea Urchin)陣

巨蚌(Giant Clam), 呢隻好大, 足有3呎濶, 佢地話係全島最大隻.

連尖(Spangled Emperor)

三鬚(Goatfish)

海參(Sea Cucumber)

跟住去Marine Ecology Research Centre, 因為每日衹開2小時, 尋日下午錯過左, 今早一定要去睇吓.

有專人講解同可以用手觸摸, 有的鯊魚, 海星, 海參同馬蹄蟹.

海洋中心內嘅石頭魚.

好少見到咁清楚嘅海鰻.

呢條老鼠班仔好 cute.

行完海洋中心, 番房間再玩浮潛.

花頭梅(Longfin Grouper)

游出少少就有個珊瑚礁.

仲有好大嘅海葵園, 旁邊有隻好特別嘅海膽.

其實仲有好多魚, 不過全都在珊瑚海葵內嘅隱蔽角落, 好難睇得到.

浮潛完就修拾行理, check-out啦.

回程隻遊艇開得快D, 5分鐘就到JesseltonPoint碼頭. 跟住就打啲去 Shangri-La's Tanjung Aru Resort.


瀏覽人數 :