桃花源 - 米芝蓮

位於上環文咸東街嘅桃花源新店, 主持人乃前恒生頂樓餐廳主廚, 優質出品絕對有保証, 更得到米芝蓮星級店嘅名譽. 如果唔事先訂位都幾難可以食到. 今日中秋佳節己事前幾日先訂位, 再訂佢嘅必食招牌菜玻璃蝦球同蟹拑, 實行黎個月滿桃花源, 浪漫吓先.

新派裝修簡潔舒服, 地下大約有10張枱, 二樓地方就大好多.

皮蛋酸薑, 免費奉送, 糖芯皮蛋香軟糯夠優質, 同鏞記嘅不相百仲.

涼伴海蜇($50) - 麻香夾爽口, 清新開胃嘅前菜.

冰鎮鵝肉卷($50) - 口感豐富複雜, 京式燻素鵝加入鵝肉絲, 清爽中帶有鵝肉嘅甘香味, 高水準.

玻璃蝦球($120) - 招牌菜系, 超巨形大蝦去衣斷根刀功細緻, 半隻手掌大嘅雪白蝦球沾上薄薄嘅玻璃上湯獻汁, 爽嫩鮮味, 伴上金華火腿鹹香中帶有蜜甜, 同樣超優質, 必食名物. 

冬瓜原隻鮮蟹拑($180) - 又一招牌菜系, 從未想過蟹拑連一整隻手臂可以一齊去殼起肉, 功夫的確係一絕, 上湯加左冬瓜嘅清香, 蟹拑肉勁鮮甜, 配搭得而, 加埋超高質素嘅廚藝, 和味無窮.

蛋白蒸原隻鮮蟹拑($180) - 同樣係原隻巨形鮮蟹拑加蛋白上湯清蒸, 比冬瓜蒸嘅較香濃味, 香滑蛋白混入鮮蟹汁, 鮮甜滑, 蟹拑啖啖肉, 天下無敵嘅滋味.

蝦子柚皮($60) - 柚皮唔太腍有口感, 可保留抽皮嘅清香而冇苦澀味, 超高水準, 蝦子上湯尤其鮮香, 送2大碗飯都絕對冇問題.

鮮蟹皇扒露筍($140) 一睇賣相就好開心, 因為蟹皇蟹肉仲多過露筍, 生拆鮮蟹皇香滑鮮甜無比, 露筍清爽多汁, 簡直係人間美味.



瀏覽人數 :