上海半日自由行

今年真係驛馬星動, 皆因連埋呢次巳經係第5次搭飛機, 3次係旅遊(11月仲會有多1次), 2次係出差. 今次去上海出差, 第1日就巳經攪掂哂, 第2朝就有半日可以自由活動. 對上一次黎上海就已經係8年前嘅事, 依家有好大改變, 半日行左外灘同浦東嘅陸家嘴, 外灘同之前相差不大, 但浦東就面目全非, 新地標臨立, 繁榮之極.

港龍飛機餐(三椒醬爆豬頸肉) -  利苑主理, 味道唔錯.

酒店地點好了能, 司機用GPS都揾唔到, 喺酒店打的出外都要call完再等10分鐘先有車到, 好唔方便.

第1睌要成11點幾先攪掂哂工作上嘅野, 第2朝一早起身(因為冇覺好訓), 諗住喺酒店附近食地道早餐, 行左一陣都冇野食(實在太荒蕪), 最後都係行返酒店食自助早餐(RMB20), 小雲吞算係比較有特色嘅食物.

食完早餐就check out, 打的去浦西外灘行吓. 的士就喺和平飯房店門口落車.

外灘廣場比8年前大左, 浦西風景就相差不大, 浦東同以前就有好大分別喇. 記得當時祗有電視塔同金茂大廈(當時係最高), 依家最高地位比上海環球金融中心取代左.

行完外灘就返浦東陸家嘴, 去金茂86樓食番餐正宗上海菜先走人.

金茂冷味拼(RMB68) - 6款招牌冷食, 陳醋青瓜海蜇頭超爽脆, 五香燻青魚香酥入味, 油爆蝦香脆鮮味連殼都食埋, 凍篙筍清爽開胃, 鹵烤麩香腍軟熟多汁, 最唔明就係有北寄貝, 但都鮮爽好味.

蟹粉扒干絲(RMB120) - 見到賣相有D失望, 蟹粉少以及黃油唔夠香, 食味比較清淡.

蟹粉小龍包(RMB38) - 即叫即包新鮮熱辣, 多蟹粉同黃油夠厚, 高質素, 食完齒甲留香.

金茂86樓視野寬廣, 居高臨下好有氣勢. iPhone 4 影出黎嘅相都幾清晰.

食完行埋金茂生活廣場, 喺果汁店飲左杯即搾番石榴汁(RMB25), 好飲但勁貴.

跟住過隔離去埋IFC商場.

商場好大, 暫時祗有小量名店開左, 食店就淨係見到利苑同金牛苑, 其他(Morton, 蘇浙總會,...)仲未開.

City'Super就喺商場地下第2層, 要經過一條小巷先見到, 都幾隔涉, 主題係Life Sytle, 入面好似小形嘅City'Super 加埋 Log-on, 仲有間餐廳添.

Apple Shop 都開喺IFC商場內, 個 logo 幾型仔.    

1點鐘就要打的出浦東機場返香港, 衹有喺機場呢度先有機會同時間買手信.

港龍飛機餐 - 有驚喜, 居然有小籠包, 燒賣同牛肉炒麵, 認真好味道.

戰利品


瀏覽人數 :