釜山3天自由遊2011 (Day 3)

Day 3 海雲台 - 機張 - 東萊- 海雲台市場 - 香港

今朝想食傳統嘅韓國早餐, 於是一早起身就去海雲台市場買地道早餐返酒店露台慢慢嘆吓.

 

  

分別喺海雲台市場門前兩檔買左3款韓式地道早餐食物. 個男店員勁似林保怡.

南瓜粥(W3,000), 好多香甜南瓜肉同紅豆, 粥底比較淍身, 幾特別.

辣醬魚蛋年糕(W4,000), 年糕軟糯煙韌, 魚蛋就冇嘜味道, 但配上香辣醬一煮就超好味道.

 壽司(W2,000), 口感豐富又夠清新, 好有風味嘅早餐.

食完早餐Hea左一陣就執埋行理Check-out出發, 第一站打的去機張市場, 主打松葉蟹, 30分鍾車費(W11,000). 入口就已經見到好多松葉蟹專門店.

原本想幫襯呢間有香港旅遊書推介過嘅機張批發店, 不過見到D松葉蟹唔係好生猛, 有D就爪腳不齊全, 都係自己揾過第2間食算啦.

   

好多生醃海鮮賣.

  

松葉蟹專門店臨立, 花多眼亂唔知揀邊間好.

松葉蟹檔之後就係以當地人幫襯為主嘅地攤市場, 呢檔好多鮟康魚賣.

最後比呢檔吸引住, 因為D松葉蟹夠大隻又夠生猛同仲有黑付子, 十足十喺福井望洋樓食嗰隻皇室獻上級別嘅越前蟹(因機張對出為日本海岸線). 揀左隻 1.5kg重(W60,000), 即刻放入後面嘅蒸爐隔水蒸煮, 好專業.

 

入店內坐低, 食吓泡菜.

 

煮蠶蛹 - 起初冇比我地, 不過見隔離台有, 就問個阿豬媽攞番碟試吓, 一咬入口感覺好粉, 味道好蛋白質同幾悶, 應該係幾有益嘅食物.

  

羅絲螺 - 其實好易食, 輕輕一吸螺肉就出黎, 不過螺肉好細粒, 螺汁就幾有海水鮮味.

約20分鍾後, 隻松葉蟹煮熟左, 阿豬媽好快手同佢斬件去殼起肉上台.

   

松葉蟹肉比阿拉斯加蟹肉纖細幼嫩, 蟹肉嘅鮮味同樣濃郁, 蟹膏香味更加濃烈, 帶丁點苦澀, 係天下無敵嘅味道.

 

意猶未盡, 加左個蟹膏炒飯(W1,000), 蟹膏香味渗入每粒飯內, 人間美味.

松葉蟹麵豉辣湯 - 鹹鮮辣醒胃, 非常味美. 

食完松葉蟹大餐再吓機張市場, 估唔估到呢檔賣嘜野呢 ? 答案就係鯨魚肉.

機張之後就打的去東萊釜山大學, 20分鍾車程車費W6,500.

   

諗住跟地圖行去溫泉廣場, 行左半粒鍾都揾唔到, 決定放棄. 行返去釜山大學前, 喺間咖啡店抖抖先.

 

店內有露天花園, 環境一流, 嘆杯Cappuccino relax 吓.

釜山大學前商圈, 好多潮流服飾店.

釜山大學前商圈 - 喺呢兩間shop買左D護膚品手信.

 

跟住唔再睇地圖揾食店, 索性打的去東萊婆婆蔥煎餅店, 原來東萊好大, 坐成拾幾分鍾先到, 車費W5,000.

   

呢間東萊婆婆蔥煎餅店係現存歷史最耐嘅名氣店, 已經做到第四代, 製作蔥煎餅嘅手藝只傳女不傳男, 真有趣.

店內必食名物"東萊婆婆蔥煎餅"(W20,000), 先將長蔥略煎, 再加上海鮮然後淋上醬汁反覆煎幾吓, 最後加入蛋槳蓋上焗一焗就完成. 東萊出產嘅綠長蔥味道香甜唔辣又爽脆, 蔥餅煎得既香脆又軟乎乎, 口感豐富又好味. 

   

東萊婆婆蔥煎餅 - 鴨肉薄餅沙律伴人蔘汁(W20,000), 店員推介, 薄餅+鴨肉+沙律菜再點埋人蔘汁一齊食幾特別.

去完東萊諗住飛的返海雲台碼頭巡遊船河去五六島, 去到碼頭先知今日太大浪所以取消晒船河, 可惜.

沿碼頭行吓, 見到有魚船返黎上貨, 好多鮟康魚啊, 海面真係幾大浪.

再行多10分鍾, 回頭望到遠遠嘅廣安大橋.

  

跟住沿海雲台沙灘行返酒店, 黄昏時份, 剛剛有人玩完堆沙.

出機場前, 梗係食埋野先啦. 今次一定要食番餐炭燒韓牛烤肉.

海雲台XX烤肉店 - 炭燒韓牛(W20,000) - 用果汁醃製, 肉質腍嫩中有咬口, 肉汁豐盈, 係送啤酒嘅佳品.

  

食完炭燒韓牛再去海雲台市場食碗湯麵, 原本有兩檔但其中一檔休息.

   

Menu 梗係唔識睇啦, 唯有指住兩幅圖, 一款冇得賣, 即獨沽一味.

海雲台市場 XX麵店 - 芝麻紫菜蔥湯麵(W4,000), 材料簡單但超好味, 食完感覺好健康同滿足.

  

跟住返酒店攞番行理仲有時間淨, 可以搭機場巴士出釜山機場, 1小時車程坐得好鬼舒服, 車費每位W6,000真係超抵.

好快手Check in完, 再上 food court 揾食, 得一間冇得揀而且八點就收檔.

  

釜山機場Food Court - 辣醬八爪魚石頭飯(W9,000), 八爪魚爽脆, 醬汁勁香辣, 滋味.

大韓飛機餐 - 豆腐沙律+雞肉飯, 非常一般.

大韓飛機餐 - 居然有鰻魚飯食, 味道算OK啦.

戰利品


瀏覽人數 :