六福 ( 西貢米芝蓮 )

假日西貢真係人山人海, 尤其係陽光普照嘅日子, 非常熱鬧同充滿生氣, 人人都心情愉快. 但係揾野食嘅時候就有D傷腦筋, 所以我地大多數食" 蘇姗娜" 舊店(新店依加已經冇做). 今次我地有備而黎, 去六福食飯, 揀左星期六下午十二點嘅最小人時段黎幫襯就萬無一失啦. 上次黎就衹係食餐牌上嘅菜式, 今次攞左位之後就去西貢街市自選海鮮,  又一個滿足嘅午餐.

西貢街市德記 - 除左大海中蝦同聖子, 仲發現有極品奄仔蟹, 當然要一試啦.

心情大靚, 啤啤佢先.

蕃茄薯仔魚湯($32), 魚鮮味十足, 香濃好飲.

XO醬煎腸粉($28), XO醬香口惹味唔太辣, 腸粉煎得夠香透, 十分出色.

豉油王炒麵($38), 炒得乾身鑊氣夠, 好味道.

豉椒炒花甲($58), 香辣惹味, 如果用埋海蜆就更加無敵.

豉椒炒聖子($40+$45), 微辣加上火喉恰到好處, 聖子大小適中,  勁鮮甜又爽口, 高水準.

  

蒜蓉開邊蒸大海中蝦($100+$45), 8大隻海中蝦鮮甜味充足, 仲有甘香嘅蝦膏, 超好味!

    

椒鹽鮑魚($92+$45), 功序繁複, 外香脆內軟滑又爽口嘅複雜口感, 同埋鹹香椒鹽中食到微微嘅鮑魚鮮味, 名附其實嘅出色招牌菜式.

油鹽焗極品奄仔蟹($300+$45), 蟹肉充實鮮甜, 流沙嘅蟹膏軟滑甘香, 鹹香同鮮甜味一齊湧入口腔內, 歷久不散, 無敵嘅滋味可比美黃油蟹.  

西貢海傍非常熱鬧, 已有人開始練習扒龍舟啦.

瀏覽人數 :