澳門摘星之旅(2012)

以往每年都會黎澳門一次, 主要都係食共hea 同感受吓小島風情. 不過自從有左自由行就完全唔同哂. 小島嘅悠閒已變得繁華趨燦, 五光十色, 背後就係人群處處, 冇位食飯, 冇的士搭. 所以我地都絕跡左澳門一排, 係近呢3-4年間先去番. 今年我地結婚25週年, 喺正日攞左假黎澳門玩兩日, 主打係食吓新野同住吓新酒店. Book左銀河大倉酒店嘅商務樓層露台房, 餐廳就預先book左3間唔同菜系嘅, 其中兩間為米芝蓮3星及2星食店, 黎番個摘星美食之旅.

一落船就先去新葡京嘅8中菜餐廳食 lunch, 早上11點幾已有好多人喺新葡京大堂.

新葡京嘅8中菜餐廳, 門外嘅葫蘆8好別緻.

經過長長嘅走廊, 去到盡頭, 門自動打開見到栩栩如生嘅金魚刺繡背景同巨型垂吊水晶球好壯觀, 不其然就嘩左一聲.

餐廳裝潢華麗高雅, 好多8字圖案非常搶眼, 我地坐大堂正中, 環境極佳.
 

叫完點心, 侍應奉上一碗湯"海底椰雪耳雞湯", 熱辣辣夠清甜, 超好味道, 真細心.

跟住仲有小食, 似精緻版嘅椒醬肉.

 

竹笙露筍嚮螺卷($38) - 用瓷器造蒸籠都係首次見, 材料清新口感豐富, 美味之極.

葡式馬介休餃($34) - 馬介休鹹香鮮味, 充滿葡國地道特式.

 梅菜皇叉燒腸($42) - 皮又薄又滑, 餡料飽滿豐富, 叉燒粒甘香肉味濃, 配以甜梅菜皇就更覺可口, 超高質素.

錦繡玉鴛鴦($180) - 賣相精美, 色彩鮮豔, 有芒果,蜜瓜,哈蜜瓜,合桃,燒鴨皮及鴨肉, 材料非常豐富.

有專人加入特製涼伴麻醬撈埋一齊上碟, 水果味道新清香甜, 鴨肉軟嫩鴨皮甘香, 加上刀功細緻, 口感豐富味道有層次, 極滋味.

原隻燒乳豬焗飯($260半隻) - 招牌必食名物, 我地預先book左半隻豬上身, 點知黎左半隻下身, 我地當然同佢講唔係下身啦, 佢地即刻重新再燒過, 服務態度非常好同夠認真.

再將半隻乳豬焗飯於席前切成4件, 每人兩件剛好又砌成8字形, 乳豬皮光滑入口勁香脆, 皮下油脂非常薄身, 一D都唔油膩, 乳豬肉質嫰滑, 釀入乳豬嘅糯米飯香糯軟熟, 乳豬油香同肉味嘅精華完全滲透入糯米飯內, 飯粒甘香豐腴, 人間美味.

隨後把餘下嘅乳豬切件奉上, 蘸少許乳豬醬同吃, 肉嫰甘香原汁原味, 非常精釆嘅一道菜式.

紅酒雪梨酥($28) - 梨形賣相好精緻, 裡面嘅餡料係用紅酒加蓮蓉再加入薑汁混成, 味道清新唔甜膩, 妙絕嘅甜品.


 

最後送上奶茶Espresso同雞蛋布甸 - 奶茶勁香滑, 布甸軟熟香甜, 作為一餐嘅完美句號. 食完呢個超優質嘅午餐感覺非常滿意同滿足, 價錢絕對係超值, 米芝蓮2星級真係名副其實, 完美.

Lunch 後喺新葡京門口等左十零分鐘就有的士, 飛的去大倉酒店check in.

大倉酒店 - 喺商務樓層check in 好舒服, 仲有西瓜汁做 welcome drink.

 大倉酒店嘅商務樓層露台房($2,400/晚), 房間尚算大, 而且整潔舒服, 設計先進, 拉出式嘅酒吧, 全自動坐廁, 浴缸旁都有架小電視, 想得週到.

露台可以望到銀河系其如兩間酒店, 銀河同悅榕庄酒店, 仲可以見到空中沖浪池, 可惜露台房層樓不高, 視野並不開揚同下層有一股熱風排出.

 

再落商務樓層同佢地要求轉房, 順便行吓商務樓層中嘅日式庭園, 東洋味十足.

跟住行吓購物廣場.

  

購物廣場大道東一邊盡頭係水晶大堂, 內有"如意晶彩".

行左一陣再問巳經可以轉房, 呢間個露台可以望到橫琴島, 非常開揚, 收貨.

酒店知道我地銀婚紀念日, 送左枝紅酒同生果盆,仲有橄欖同日式銘果, 真窩心.

出外晚餐前落lounge 飲杯野, 揀左兩款唔同年份嘅威士忌, 同樣有勁濃烈嘅酒味, 仲有牛同薯片送酒.
 

酒店免費專車分唔同地區排唔同嘅人籠, 出新馬路就最多人排隧.


 

落車行左一陣就到今晚食飯嘅地方"陸軍俱樂部", 即新葡京後面, 係一間超過百年歷史嘅餐廳(建於1870年), 主打傳統特式葡國菜.



 

陸軍俱樂部嘅 dress code 係 smart causal, 餐廳常常坐無虛設, 預先訂位就會好D.

陸軍俱樂部環境優雅好氣氛, 樓底夠高令人好舒服.


 

Sangaria($75) - 食晚飯可以飲番D酒, Sangaria就係我地嘅至愛, 清新果香又唔梗, 今次仲勁多生果, 超正.

蒜蓉焗蝦($88) - 新鮮大蝦鮮香爽口, 係一流嘅餐前小食, 麵包蘸醬汁食更覺滋味.


 

手切PataNegra煙火腿($128) - 鹹中帶甘香媲美西班牙嘅Iberico, 高質素, 手切刀功令肉質更有咬勁, 蕃茄sasa醬同多士可中和鹹味, 配搭得而, 滋味無窮.

燒葡國香腸 ($98) - 葡國地道食品, 勁鹹香惹味, 送酒佳品, 但我地就覺得鹹左DD.

 CaldoVerde青菜薯蓉湯($38) - 青菜放喺中間, 旁邊有烤葡國腸粒, 再由侍應淋上薯蓉忌廉湯底, 極之美味嘅出品.

  

葡式鹽燒沙甸 ($68) - 做法傳統, 用大量香料同海鹽焗熟, 沙甸魚肉鮮香惹味, 超高水準.

葡式炒蜆($78) - 蜆肉鮮甜軟熟, 配香草白酒牛油汁更加滋味無窮, 伴麵包食一絕.

葡式海鮮燴飯($188) - 用較濕嘅葡式傳統做法, 海鮮湯底鮮香濃郁, 將所有蝦肉,魷魚,帶子和蜆肉嘅精華盡在湯同飯之內, 每口飯都係人間美味, 極品.

食完飯想漫步行吓夜街, 點知落雨, 唯有去番新葡京打的返大倉酒店.

銀河購物廣場內都有咀香園餅家.

銀河夜景

行完購物廣場返大倉酒店房間坐一陣, 又到消夜時間, call room service 嘅推介星州炒米便檔 ($88), 炒得香辣惹味, 叉燒大蝦啖啖肉好爽引, 金銀饅頭點牛奶食可作點品, 高水準嘅出品. 食完消夜睇番套DVD Movie, 之後就一宿無話.

第二朝落商務樓層食自坐早餐, 款式唔多但質素OK.
 

煙三文魚炒蛋多士, 幾有創意.

 黎多件煙火腿炒蛋橄欖多士.

 健康好味嘅雜錦頭盤.

清清地再整番碗日式白粥加小乾魚仔就剛剛好.


 

食完早餐行吓購物廣場, 大道西邊盡頭就有個"運財銀鑽", 剛剛開始 show time. 

 "運財銀鑽" - 約5分鐘就做完.

睇完"運財銀鑽"跟住就去"空中沖浪池", 有人做沙灘同人做浪, 可惜今日天陰陰, 所以無嘜人.

去泳池揾過位坐吓, 今朝好大風, 坐左一陣就走人.

 酒店check out 完就飛的士去新葡京, 午餐訂左喺43樓嘅米芝蓮3星餐廳RobuchonAu Dôme天巢法國餐廳, 要喺大堂搭升降機到38樓, 再行去搭另一專用升降機先可到頂層, 沿途經過酒庫, 超過5,000枝藏酒, 的確陣容頂盛.

 

一入門口巳被超高超長嘅水晶吊燈同木鋼琴所吸引.

裝修設計名副其實如天巢一樣.

 頂層居高臨下, 坐窗邊位視野特別開揚.

Set lunch 有3款, $458 / $558 / $688, 可另加餐酒配搭, 我地同樣揀$558嘅 4個 course lunch.  

晶瑩剔透嘅水晶玻璃杯.

麵包車上全係剛剛新鮮出爐嘅法式麵包.

 

法式麵包籃 - 新鮮熱辣好味, 留 quota 所以要閘住先.


 

 巨形牛油喺你面見即片, 分有鹽同無鹽, 我地兩隻都試, 都係有鹽好味D.

 

頭盤未黎之前, 先奉上餐前小食.

餐前小食 - 意大利米卷, 刀功細緻, 入口好清爽.

餐前小食 - 牛油果蕃茄汁, 口感同味道都好有層次, 開胃醒神.

餐前小食 - 意大利脆餅, 鬆脆無比.

 頭盤 - 鮮蟹肉伴海鮮啫喱椰菜花香露, 賣相精美如藝術晝, 蟹肉雲吞好薄好精緻, 亞拉斯加蟹腳肉軟熟鮮甜, 海鮮啫喱滑溜溜, 相當精采嘅一道頭盤.

頭盤 - 煙鵝肝黑松露暖薯仔沙律, 煙鵝肝超級軟滑, 甘香豐腴, 同黑松露碎味道配合剛好, 勁滋味.

湯 - 白磨菇忌廉湯菠菜雲吞西班牙火腿絲, 賣相平平無奇, 入口充滿蘑菇嘅野菌香濃味, 菠菜雲吞有嚼勁, 西班牙火腿絲帶出鹹香, 整體味道同配搭都能做到好平衡.

湯 - 白蘆筍忌廉湯暖海膽啫喱時蘿, 將材料砌成精緻圖案, 上桌時才淋上白蘆筍忌廉湯, 海膽啫喱勁滑溜, 甘香夾鮮味, 名副其實色香味全. 

主菜 - 炸田雞腿香蒜歐芹香草西班牙燴飯, 田雞腿超香嫩鮮味, 泡泡香滑清爽, 西班牙燴飯夠入味同al dente, 無懈可擊嘅美味.

主菜 - 焦糖燒珍珠雞腿肉煎鵝肝香草沙律薯蒜, 烤鵝肝外脆內嫩火喉恰到好處, 珍珠雞腿肉香味獨特有食野味嘅感覺, 伴香草沙律食極有法國菜嘅風味,  天衣無縫嘅法式組合.



 

主菜之後就到甜品, 專人推架甜品車黎逐一介紹, 每位可揀3款.

甜品 - 鮮果沙律, 新鮮醒胃.

 

甜品 - 焦糖蛋球, 入口鬆軟溶化, 薑糖橙條夠醒神.

 甜品 - 拿破崙超級鬆化, 吉士忌廉夠豐厚, 而且香軟滑溜. 藍梅杏仁餅香甜好味, 兩款出品都好有法國特式.



 

 甜品 - 香甜嘅煮菠蘿比較簡單, 開心果蛋糕有好濃郁嘅開心果仁香味, 同屬優質出品.

多姿多彩嘅糖果車, 非常吸引.

 

PetitsFours - 法式糖果細膩優雅, 送咖啡一流.

 

焦糖泡沫咖啡 - 飲埋杯咖啡就係完美無瑕一餐嘅句號, 食完有好幸福嘅感覺.

 去程搭金光飛航比較搖晃, 回程改搭新渡輪嘅TurboJet就好好多.

戰利品 - 酒店送嘅紅酒喺澳門無時間飲, 攞番屋企慢慢歎.

瀏覽人數 :