天香樓 - 舌尖上的杭州

對天香樓真係又愛又恨, 因為佢地出品嘅杭州菜真係宇宙最強, 好食到無朋友, 但價錢勁貴, 每次黎都覺得好奢侈, 正值大閘蟹季開鑼, 今日又心痕痕黎呢度幫襯, 清清地食左四道小菜加半斤花雕埋單近二仟大元, 完美滿足嘅一餐.

一樂 - 燒鵝肶瀨

位於中環陸羽附近嘅一樂燒鵝, 主打燒味, 尤其係燒鵝最為出色, 同隔離街間鏞記有得揮. 價錢仲平一大截, 名附其實正靚平, 燒鵝肶瀨更係超級無敵之選, 大滿足也.

The Salted Pig - 英式農鄉菜

位於中環SoHo區附近開業無耐嘅 The Salted Pig, 睇個名都知係以豬為主要食材嘅餐廳, 佢地仲會搜羅世界各地最優質嘅豬肉, 做出多款特別菜式, 而且仲充滿英式農鄉風味. 餐廳氣氛好 causal, 令人好舒服, lunch 價錢又好超值, 以下就係一餐稱心如意嘅 lunch, 遲吓可能會試埋呢度嘅晚餐添.

餐廳大門右邊為酒吧, 左邊為餐廳, Counter前有D隻豬形公仔賣, 隻豬好Q同會發出豬叫聲, kawaii 呢.

阿里朗 - 正宗韓國味道

本港韓國菜館真的不少, 而近年坊間仲越開越多, 呢間位於尖咀嘅阿里朗開業已久, 一直都未試過, 因為地點同門面極不顯眼, 有日 Lunch 行過入去一試, 發覺出品好正宗, 選用材料非常優質, 做出地道嘅韓國風味, 所以好多韓國人幫襯, 我地一連食左幾次都好滿意, 呢度勁難Book位, 想幫襯就真係要講吓緣份, 依加HSBC Card 仲有九折, 超抵架.

裝修簡潔乾淨, 環境光猛舒適.

泡菜款式不多, 有韓國人同香港人之分, 我地就比一般泡菜, 味道OK啦.

靚粥工房 - 塔門大尾魷

剛剛睇完J2嘅飲食男女介紹呢間靚粥工房, 背境都幾特別, 主打材料有塔門大尾魷同馬交魚. 今日一於去食吓 Lunch, 小食店式嘅環境加上家庭式嘅出品, 樣樣都做得好用心, 明附其實係平靚正之選.