得龍 - 好味懷舊菜

今日約左朋友出黎食飯, 没有idea之下原本諗住去九龍灣大榮華, 不過之後記得新蒲崗有間食懷舊菜嘅食店”得龍” 好多人曾經推介, 就早一天打電話去訂位及訂餸, 可惜已知祇有金錢雞,沒有鴨腳包, 不過其他菜式都唔錯, 當日3個人食左8過菜埋單都係六佰幾, 仲有幾好食嘅紅豆沙奉送, 都算得價廉物美. 原來此店巳有45年的歴史, 1963年是第一間在新蒲崗的茶樓(老版親身表白).

金錢雞($45) - 有子薑,叉燒,雞潤同冰肉(即肥豬肉), 一齊食就有豐富層次味道嘅口感.
=================================================

古法太爺雞($99 半隻) - 即茶燻雞也, 雞肉幾香幾嫩滑, 煙燻味不太重.

山渣咕嚕肉($58) - 炸得外脆內甘香鬆化, 過汁酸甜適中自然, 沒有一般的搶喉, 好食.

西蘭花炒雙翠 - 比較普通, 冇嘜特別.

雀巢九味蝦 - 配角比主角仲出色, 芋頭做嘅雀巢, 香脆而不油腻, 炸南瓜條外皮脆內香甜軟棉棉, 主角九味蝦就爽口彈牙啖啖肉.

砵酒焗生蠔 - 用上桶蠔, 份量十足, 酒香同軟熟嘅生蠔味道都幾夾.

燒鵝($79) - 即燒燒鵝, 等左成25分鍾, 皮脆肉嫩, 不過淡口左D. 

台山焗蟹缽($58) - 肉蟹加埋攬角肉碎同蛋一齊焗(可能是炸), 如用大隻D嘅水蟹, D鮮蟹味融入蛋內仲正, 幾有特色.