伊豆5天自駕遊(Day 4)

Day 4 : (下田大和館 - 伊豆高原 - 大室山 - さくらの里 - 城崎海岸 - 門脇吊橋 - 伊東道の駅 - 熱海駅前仲見世通 - 水葉亭)

一早起身行出露台睇吓海景, 今日天氣超好, 環境勁正.

早上已有好多衝浪者喺海上一展身手, 非常熱鬧.

跟住去浸番個朝の溫泉, 之後就去餐廳坐番尋晚食飯間房食溫泉早餐.

非常美味嘅溫泉早餐, 大滿足.

自家制漬物 - 清新爽脆.

希靈魚子 - 口感豐富.

凍豆腐 - 加點醬油, 好有似食緊鹹布甸.

魚絲醬油漬 - 鹹鮮味濃, 送飯一流.

地魚茄子煮 - 魚肉嫩滑, 茄子清新.

玉子燒 - 軟熟香甜, 蛋汁豐富.

原籠蒸蔬菜, 五款蔬菜都好新鮮, 原籠蒸保留原有味道.

自選燒地魚一夜干 - 池魚, 竹筴魚同金目鯛任揀, 我地揀左頭兩款, 慢火燒至皮脆肉嫩, 鹹鮮香惹味, 送飯佳品.

吞那魚蓉伴納豆 - 攪至起絲再加埋紫菜撈飯食, 簡直就係絕配, 人間嘅美味.

伊勢海老味噌汁 - 勁鮮甜, 超好飲.

甜品係香橙乳酪 - 香甜清新, 超完美嘅早餐句號.

食飽飽後再細心行吓酒店大浴場, 入口前有鯨鯊立體鳥瞰圖劃, 好精美.

再沿長長嘅樓梯行上, 就到大浴場. 

樓梯兩旁掛滿好Q嘅魚類圖畫.

跟住行去酒店大堂.

再被大堂落地玻璃外嘅絕景所吸引, 真係要望多幾眼.

索性坐低一路嘆咖啡(￥1,000)一路望住沙灘靚景, 極爽引.

大浴場樓梯兩旁掛嘅魚類圖劃就係呢個作者所嘅傑作, 佢對魚類眼睛有獨特分析, 所以圖畫上嘅魚眼特別精靈.

 

Check out 後向伊豆高原出發, 第一站去"大室山".

要坐登山吊車上山頂, 每位￥500.

山頂中央有一射箭把場.

沿山頂四周望下, 可以用360度觀賞靜岡縣, 視野廣闊.

山頂氣溫低同勁大風, 行左一陣就頂唔順, 入舖頭飯番枝熱辣辣嘅伊豆鮮牛奶, 暖入心.

跟住搭吊車落山, 腳下空空有D驚.

"大室山"之後好快就到第二站, 賞櫻勝地"さくらの里".

今日櫻花須然並非滿開, 但依然遊人眾多. D櫻花好吸引呀.

公園內有檔燒冬菇(￥300), 燒得香氣撲鼻. 買份一試, 清香好味, 軟熟多汁, 滋味到極.

一食就唔停得口, 見到燒粟米檔D肥大粟米非常吸引, 再黎枝粟一燒(￥400), 香甜多汁.

跟住幫襯埋隔離檔嗰Ｄ煨蕃薯(￥250), 軟熟香甜, 和味也.

伊豆高原櫻まちつり - 沿路向伊東出發, 兩旁盡是燦爛嘅櫻花樹.

半粒鐘就到"門脇吊橋" , 入口有個外型獨特嘅"門脇崎燈塔".

"門脇吊橋"長48M高23M, 喺伊東市著名景點.

沿橋行過去, 可以見到4000年前大室山爆發噴出溶岩流入海中, 再經長年海水侵食而成嘅天然城ケ崎海岸岩景. 可惜呢度好多大貓, 不而久留, 影完相要即刻鬆人.

遠距離睇吊橋與城ケ崎海線, 份外壯觀.

完成伊東之旅, 下一站就去"熱海", 喺伊東道の駅食Lunch.

呢個"伊東道の駅"真係好大, 車水馬龍, 等左一陣先有位泊車.

商場地下有好多地道名物售賣, 樓上就係餐廳.

有圖片睇就一目了然, 點餐超方便.

咖喱牛肉飯(￥850), 選用伊豆牛肉, 入口軟嫩無渣, 日式咖喱香而不辣, 超好送飯.

燒牛肉丼(￥750), 同樣使用伊豆和牛, 仲多左燒烤香味, 平靚正, 人間極品.

喺"伊東道の駅"商場買左枝地道醬油同海鹽, 然後上車直去熱海.

入熱海先到熱海駅, 行吓"仲見世通"同"平和通", 今日遊人不多, 比較冷清.

趁未天黑要去酒店, 因為境觀一流嘅露天風呂六點鐘就關門. 點知行到酒店附近個GPS突然神神地, 嘥左大半個鐘先到位於熱海溫泉鄉伊豆山溫泉酒店"ホテル水葉亭"(￥33,900) , 入房後放低行李就即衝去浸溫泉.

好彩去到露天風呂尚有少許時間, 浸吓睇吓, 環境超正, 真係值得一到, 但大浴場就比較舊同人多.

浸完溫泉返回酒店, 先嘆吓茶同果物, 酒店房間幾大同夠光猛, 仲有無敵海景露台, 可惜舊左D.

今晚嘅溫泉晚餐"当館板長自慢の地物を活かしたお料理更に海の幸海鮮舟盛付ブラン!ごタ食", 望落雖然豐富, 但出品似團體餐多D. 因前兩晚溫泉料理實在太精釆, 所以對呢餐好失望.

海の幸海鮮舟盛 - 蠑螺, 劍魚腩, 鯛魚, 吞那魚腩, 甜蝦, 北寄貝.

前菜與醋漬物 - 水雲, 豆腐, 魷魚, 帆立貝, 櫻の銘菓.

茶碗蒸.

魚肉野菜揚物.

蟹肉豆腐魚肉煮.

伊豆和牛海老陶阪燒.

海鮮焗野菌.

冷蕎麥麵.

生果與甜品.

食完都無需再去大浴場浸溫泉, 落大堂行吓紀念品店, 好有強國feel嘅友誼商店, 半分鐘行完. 早D返房大覺瞓.

 瀏覽人數 :