今個復活節攞多1日就有6日長假期, 大半年前巳開始籌備呢個日本之旅, 坊間講日本伊豆嘅旅遊書不多, 唯有買日文版睇, 日文版D相片好精美同講得好詳細, 原定5日４晚住喺伊豆東南西北４四邊巳經好足夠, 點知越睇就越多地方想去, 想改玩多1日都巳經冇機位返. 今次整個行程都安排得非常順利, 每日大約2個鍾車程好悠閒, 喺日本自駕遊係一種超舒服嘅享受, 沿途風景優美, 加上5日黎都陽光普照, 天清氣爽, 回程個日仲有時間去埋橫濱, 中華街真係好大同非常熱鬧. 呢次順道睇埋櫻花, 仲見識到花吹雪嘅絕景, 勁開心. 自從知道地產地消嘅概念之後, 今次食好多當地出產嘅生櫻花蝦, 金目鯛, 地魚一夜干, 生長於水深300M嘅巨形高足蟹, 非常美味, 仲有天城山出產嘅新鮮連葉嘅生山葵(Wasabi), 溫室果園即摘即食新鮮香甜多汁嘅草莓, 真正一枝棒也. 3晚溫泉酒店都名有特式, 私人露天風呂睇日落勁正. D ￥嘅滙水超高, 差唔多 HK$1,000=￥10,000, 用得有D肉赤, 不過最肉赤都係跌左枝新買嘅長鏡頭落花田, 整花左.
Day 1 : (曰本羽田機場 - 御殿場 - 沼津港魚市場 - 魚河岸丸天)
國泰飛機早餐, 一中一西味道都OK, 牛角酥仲好好食.
一到曰本, 第一時間去日產租車部 check-in.
等緊車接我地嗰陣, 去Information Center 睇吓有冇料攞 .
15分鍾車程就到攞車地方, 架Cube 好Q同都幾形仔, 內籠好寬闊. 5日車租￥28,140, 行左564公哩, 油錢￥6,600, 最快揸過時速130公哩架.
第一站去御殿場, 要個半鍾車程, 出發前去便利店買D飯團同燒雞串醫吓肚先.
途中見到遠遠嘅富士山.
御殿場雖然叫 Factory Outlet, 但價錢跟香港零售價差唔多, 冇嘜吸引力.
呢度同富士山距離好近, 係欣賞富士山嘅好地方. 山頂終年績雪, 景色靚絕.
御殿場 Food Court, 不太吸引, 都係早D落沼津揾野食啦.
沼津地方不大, 先去魚市場附近睇吓, 太夜所以唔係好熱鬧, 行左一陣見到旅遊書推介嘅魚河岸丸天, 唔再揾其他, 就喺度食晚餐.
接近關門時間, 所以全店衹得我地同另外一位客人.
魚河岸丸天主打海鮮丼, 當然要試啦.
魚肉麵豉湯, 內有大量魚肉碎, 鮮味無比.
麵豉蟹湯, 半隻花蟹煮豉蟹湯, 超鮮甜好飲.
食完就速速去酒店 Check-in, "沼津リバ一サイドホテル" ￥7,000一晚, 超近沼津魚市場, 仲有富士山景, 平靚正之選.
瀏覽人數 :
沒有留言:
張貼留言