2013年2月11日 星期一

紐西蘭南島10天自駕遊 (Day 4)

Day 4 : [但尼丁(Dunedin) - 保雲街(Baldwin Street) - 吉百利朱古力世界(Cadbury World) - 蘭納許城堡(Larnach Castle) - 八角廣場(The Otagon) - 但尼丁火車站 - 奧塔哥半島(Otago Penisula) - 皇家信天翁(Royal Albatross) - 黃眼企鵝(Yellow Eye Penguin) - 海獅(Sea Lion)]










一早6:30超身諗住睇日出, 噢! 點知今日D雲層太厚了, 擋住左個太陽添





唯有落餐廳食早餐, 我地係餐廳今朝第一批客人, 揀左個無敵海景嘅窗口靚位.
 



餐廳提供歐陸形式自助早餐, 輕便簡單, 我地仲包埋可以喺餐牌度任選.





鮮橙汁加無敵海景已經舒服到暈啦.





自選早餐 - Poached Free Range Eggs, Hand Crafted Hash Browns, Buttered Spinach, Smoked Salmon, Lemon & Chive Hollandaiseaked焗紐西蘭煙三文魚香軟鮮嫩, 半熟蛋香滑豐盈蛋味濃, 香草荷蘭汁加香脆烤薯餅, 天下無敵嘅早餐.




自選早餐 - Pier 24 Chef's Breakfast(Free Range Scrambled eggs on Toast, Grilled Bacon, Grilled Vine Tomato, Hand Crafted Hash Browns, Bratwurst Sausages, Onion Relish). 所有精選出品一次過晒冷, 烤煙肉鹹香惹味, 配炒滑蛋一流, 香腸都算對辦, 烤蕃茄香甜多汁, 食香脆嘅烤薯餅都唔洗加茄汁, 焦糖化嘅洋蔥汁更加香濃甜美, 名副其實, 非常豐富同令人滿足嘅招牌早餐.




最後嘆埋杯自制紐西蘭咖啡, 香濃滑, 完美無瑕.






喺St Clair Beach見到曙光初現, 心情大靚, 梗要影張相啦, D曙光好靚呀 !






食完早餐再去 Bladwin Street, 今次揸埋架車上到盡頭, 真係勁斜到可以入健力士紀錄大全, 要用D2波加關埋冷氣慢慢上, 好在架車夠力.





唔洗行上黎梗係舒服好多, 上得高D就睇得遠D啦.





然後出市中心The Otagon 八角廣場, 先去下午local tour(睇信天翁同企鵝)集合嘅地方i Site 遊客中心探吓路.





跟住就去吉百利朱古力世界, 喺門口泊低車, 要喺meter位買左飛先(每小時NZD2), 用信用卡都得, 又幾先進喎.






年中無休真係勁.




諗住參加個45會分鐘嘅快速導賞遊, 點知原來只係假期先有, 平日要報粒半鐘嘅導賞遊, 太認真了, 所以衹係入場行吓睇吓歷史就算, 每位NZD5, 仲有禮物包送. 有好多懷舊嘅吉百利朱古力包裝, 都幾得意.





最吸引都算係呢個喺入口嘅吉百利朱古力礦山喇, 金光閃閃.






10分鐘行完吉百利朱古力世界, 大把時間剩, 決定去埋史佩玆啤酒廠(Speight's Brewery).








去到史佩玆啤酒廠(Speight's Brewery)入內睇睇, 點知下一個導賞遊要12點先有, 仲有成粒鐘點等呢? 無緣就行吓紀念品店影吓相算把啦.






速揾旅遊書睇吓仲有邊度好去呢, 最後決定去30分鍾車程嘅蘭納許城堡(Larnach Castle), 途經牙形嘅雕像幾特別, 原來呢度叫海港嘅口(Mouth of the Harbour), 所以有六隻大牙雕像, 十分有趣.





原來蘭納許城堡(Larnach Castle)位於奧塔哥半島(Otago Penisula)之上, 我地沿Portobello逢山過山, 居高臨下風景特別優美.





過埋呢段被密密麻麻樹林包圍嘅車路就到喇.






蘭納許城堡(Larnach Castle)係紐西蘭唯一嘅城堡, 係由一位出生於蘇格蘭嘅銀行家(William Larnch)從1871年起興建, 共花15年時間打造而成.






城堡門前有兩對威風凜凜嘅雄獅同麻鷹石像.





大門望出去係花園同草地, 視野好開揚.






去完蘭納許城堡(Larnach Castle)出返去市中心, 揾左呢間位於 St George Street嘅The Reef 餐廳食個大大午餐, 因今晚會好夜(10時後)先有機會食晚餐.




The Reef 裝修高雅舒適, 分酒吧同餐廳兩個分區, 主打海鮮類菜式, Express Lunch 每款衹係NZD10. 超抵.





Breads & Dips(NZD8.50), 蒜蓉包新鮮香脆, Dipping Sauce 有蕃茄蓉醬(香甜清爽)同香草魚肉醬(鹹鮮惹味)同樣獨特, 同蒜蓉包非常匹配.





Classic Prawns Cocktail Salad with Crusty Bread(NZD10) - 大蝦沙律, 勁多爽口大蝦, 滋味.





Steamed Green Lipped Mussels tossed in a Garlic & Parsley Butter Suace(NZD10) -  蒸紐西蘭青口厚肉軟熟鮮甜, 蒜蓉牛油香草汁勁好味, 醮麵包一流.





Crumbed Sole with Fries & Salad with Tartare Sauce(NZD10) - 炸紐西蘭龍脷柳外層香脆, 唯魚肉比較薄身, 炸薯條配他他汁香口好味, 大量沙律菜清爽去熱氣.





St George Street 乃市中心主要大街, 兩旁商店食店臨立, 大廈建築得好有特式同色彩豐富, 大街同時貫通八角廣場.





St George Street 上嘅一間Knox Church, 都建築得幾宏偉.





泊好車之後就喺八角廣場行吓, 呢度就係市中心最熱鬧嘅地方.






八角廣場上嘅蘇格蘭詩人Robert Burns 雕像及背後嘅聖保羅大教堂.





聖保羅大教堂(St Paul's Cathedral)旁為但尼丁市政廳(Dunedin Town Hall).







八角廣場連戲院(Fortune Theatre)都可以喺度揾到.






但尼丁好出名嘅第一教堂(First Church), 歌德式嘅建築好有氣勢.







沿Stuart Street行落去, 盡頭就係但尼丁火車站, 好易揾.





必遊景點 - 但尼丁火車站.






但尼丁火車站, 上層為運動展覽廳, 樓梯欄杆同彩繪玻璃窗都係參觀重點.




除左峽谷景觀列車(Taieri Gorge Railway), 即右邊黃色火車尾的一班外, 巳好少其他班次行走.





火車站旁有架幾百年歷史嘅古董蒸氣火車頭.




時間尚早, 就喺i Site 對面嘅Sugar Cafe 坐低飲杯紐西蘭咖啡順便唞唞.





等到成4點架事專車先到(原定3點半), 出發去睇睇信天翁同企鵝啦.





先到皇家信天翁嘅保護區(Royal Albatross Colony), 位於奧塔哥半島(Otago Penisula)頂端.




有專人講解皇家信天翁嘅成長過程同生態.





聽完講座就出戶外後山嘅孵育地睇信天翁, 呢度超級大風, 好彩我地可以入屋仔睇, 見到遠遠嘅一家四口.






除左信天翁, 地上仲有好多海鷗.





信天翁乃全世界最大嘅海鳥, 對翼展開有成3~4米闊, 仲可以滑翔飛行, 飛行時姿態優美.





六隻信天翁一齊徐風滑翔飛舞, 難得一見嘅景像.





睇完信天翁就上番車去第二個山頭度睇海獅同企鵝, 大風到連D樹都吹斜晒, 大自然嘅力量真係好勁.





車路行完, 要人行喇, 一路向山崖方向行落去, 咁荒蕪嘅山頭居然有羊, 真有趣.





行左十幾分鍾終於到盡頭啦, 不過一陣原路回程上山個時就行到氣喘, 勁甘喇.




呢度都算係天崖海角, 一望無際, 原來我地巳經差不多身處於地球嘅底部(Bottom of the World).





好多海獅喺石上, 有隻仲喺度飲緊奶.





再行去另一邊嘅海灘, 未到海灘已經見到一對黃眼企鵝(Yellow Eye Penguin)企定定擺 Pose, 任影唔嬲.




企鵝Kiss, 好溫馨呀.






同對黃眼企鵝好近距離呀.





沙灘上仲有企鵝回歸嘅足跡, 行到中吓中吓幾得意.






落到海灘, 見到有隻海獅(Sea Lion)喺度瞓緊覺.






去到沙灘盡頭有間屋仔, 我地可以喺度靜靜地睇黃眼企鵝回巢, 有兩隻呀.




原來黃眼企鵝係生活喺山上而唔係水上.





回巢後嘅小企鵝有D躲在洞內休息, 睇唔清楚佢係黃眼企鵝定係好怕醜嘅藍眼企鵝添 ?






睇完走人之際又見到另外兩隻黃眼企鵝回巢, 一前一後喺海灘行緊, 要好有眼力先睇到架.




突然又見到有一隻海獅上左岸.






呢隻海獅好大隻好活躍, 仲識擺好多 Pose,  好鬼得意.







我地走晒之後海灘上只剩下兩隻海獅二人世界, 好浪漫也.






返回市中心巳經晚上10點喇, 攞車途中可以順道欣賞埋聖保羅大教堂(St Paul's Cathedral)同但尼丁市政廳(Dunedin Town Hall)嘅夜景都唔錯.






 
晚上10點餐廳已經關晒門冇飯食. 我地今朝已經知道有間Countdown超級市場仲開可出以買野食.






杯麵加火腿和沙律, 簡單好味嘅晚餐, 食完大覺瞓.




瀏覽人數 :


無料カウンター

沒有留言:

張貼留言

Related Posts Plugin for WordPress, Blogger...