紐西蘭南島10天自駕遊 (Day 8)

Day 8 : [Kaikoura - 抹香鯨(Sperm Whale), 暗色斑紋海豚(Dusky Dolphin), 皇家信天翁(Royal Albatross) & 海豹(Seal) Watching - 鐵板燒龍蝦(Lobster BBQ Lunch) - Seal Colonies - Kaikoura觀景台 - 自家制私房菜]

 一早起身睇日出, 不過今日D雲都幾厚.

返酒店煮早餐, 材料就係尋日喺Christchurch買用鹹水草綁住嘅廣東白菜, 港制造嘅出前一丁麵, 再加埋凍火腿(NZD6.49)做餸就飲食均衡啦.

無添加天然紐西蘭地產雜果汁(NZD5.99), 好飲又健康.

自家制早餐  - 火腿扒廣東白菜配出前一丁麵加無添加天然紐西蘭地產雜果汁.

嘆埋杯紐西蘭咖啡, 滿足.

食完早餐將所有碗碟鑊杯放晒落洗碗碟機度, 然後按個掣就好快乾淨番晒啦.

Kaikoura最熱鬧嘅地方就係市中心嘅主要大街West End喇.

St. Paul's on the Hills 相信係Kaikoura唯一嘅教堂.

West End 大街上有座頭鯨(Humback Whale)圖案嘅磚牆.




 

呢間餐廳仲用抹香鯨(Sperm Whale)作牆身背景, 好搶眼.

沿West End 一路行到Esplanade嘅尾段, 再落到尾Armers Bay 就係海豹嘅棲息地(Seal Colony), 好多海豹喺石上呀.

呢隻海豹認真懶惰, 一上岸就瞓覺, 我慢慢行近佢大約喺5米距離拍攝.

夠鍾集合就到Whale Watch Center 等出發, 巳經有人坐直升機去觀鯨.

館內有介紹抹香鯨(Sperm Whale)同暗色斑紋海豚(Dusky Dolphin)嘅資料.

攞左登船證之後就去睇十分鐘安全影片, 然後坐車去South Bay碼頭.

十分鐘就到達Whale Watching 喺South Bay 嘅私人碼頭, 登船出發.

暗色斑紋海豚(Dusky Dolphin), 屬於體型較細小嘅一種海豚, 身長1.65~1.95m, 體重60~90kgs, 天生活躍同好奇心極重, 週不時表演空中翻騰動作. 我地出海航行左約半小時已經見到多條Dusky Dolphin喇.

船上裝有聲納探測設備, 係用黎追蹤抹香鯨嘅器材, 1小時後終於揾到一條, 條抹香鯨依家喺我地船底, 我地架船慢慢同佢用同一方向前進, 等佢上水呼吸, 同一時間另一隻船收到料駛緊埋黎.

終於等到佢上水呼吸啦, 抹香鯨(Sperm Whale), 屬於大型齒鯨(Toothed Whale), 身長15~18m, 體重20~50tones, 平均壽命50~70年, 四角型嘅大頭占1/3身長係外觀嘅最大特色, 腸內會分泌出珍貴嘅龍涎香香料, 最喜歡食深海大烏賊, 一次下潛可到深海600~1600m, 最長可閉氣二小時, 呢條抹香鯨嘅呼吸聲好大, 終於親眼目睹咁震撼嘅場面.

拾零分鐘後條抹香鯨潛番落深海, 用尾巴同我地 Bye Bye.

跟住見到皇家信天翁(Royal Albatross)喺海中暢泳, 信天翁乃全世界最大嘅海鳥, 對翼展開有成3~4米闊, 仲可以滑翔飛行, 我地喺Dunedin巳經見過佢飛行時嘅優美姿態, 今次仲近距離睇埋佢嘅海中泳姿, 真幸運.

架船跟住駛去Barney's Rock(Seal Colony)係海豹嘅棲息地.

好多海豹(Seal)喺有岩石上休息.

呢度好可能係海豹上落岩石嘅碼頭, 好多海豹喺度上水同下水, 真係豹山豹海.

睇完紐西蘭三寶之後返碼頭坐車返回Whale Watching Center解散, 其實我嘅另一半就由開船半小時後就開始暈船浪, 暈浪帶同止暈止嘔藥用齊都無用, 之後仲嘔到七彩, 所以一上岸就要即刻揸車返酒店休息喇.

下午比較好天, 獨自揸車出市中心 West End行吓.

想買條泳褲聽日出海著, 入去睇睇, 不過好貴同好舊款.

Paua Jade Bone 係賣鮑魚殼飾物嘅專門店, 外牆好有特式.

有D肚餓, 喺壽司店買左牛油果三文魚卷(NZD6), 味道唔錯.

Fyffe House, 建於1842年, 係Kaikoura歷史最古老嘅建築物, 乃以前捕鯨工人嘅棲身之所.

Armers Bay 海灣盡頭就係今朝去過嘅海豹棲息地(Seal Colony), 碧海藍天真舒服.

沿路再上就到達當地著名食店, 紐西蘭地產海鮮燒烤店(Kaikoura Seafood BBQ), 各地旅遊集誌大力推介,  依家坐無虛設Full House, 就揸車返酒店抖吓.

跟住我地一齊再揸車出到黎就己經有位食飯喇, 泊低車坐好位就去揀食物, 原來D新鮮龍蝦就放喺藍色嘅冰箱內, 我地揀左最大嗰隻黎做鐵板燒.

食海鮮嘆啤酒, 人生一大樂事.

揀完海鮮就即場制作.

鐵板燒紐西蘭青口(NZD7), 香口惹味, 蒜蓉烤紐西蘭帶子(NZD8), 肉質軟熟鮮甜, 上碟時跟白飯,麵包同沙律都算幾特別.

鐵板燒紐西蘭龍蝦(NZD74/隻), 主角終於出場, 燒烤香味十足, 紐西蘭地產龍蝦鮮甜爽口啖啖肉, 蝦頭膏更甘香滋味, 名副其實必食名物, 超級大滿足.

食完龍蝦再到Seal Colonies睇海豹, 點知下午水退後D海豹就唔見晒.

要行出去週唯揾海豹, 岩石上有好多海洋生物, 海澡海螺樣樣齊, 生態環境非常好.

行左15分鍾後終於揾到隻小海豹仔, 好精寧同我鬥望.

跟住就懒洋洋扒喺地曬太陽.

睇完海豹揸車四圍兜, 見到有Kaikoura 觀景台, 當然要去.

觀景台上可以見到整個Kaikoura市中心, Beach Road 對出係一望無際嘅太平洋.

呢個角度仲清楚, 左邊係睇抹香鯨, 海豚同海豹嘅South Bay, 右邊就係Kaikoura市, 中間嗰條就係SH1公路.

Beach Road 上嘅龍蝦酒店, 個招牌好吸引.

喺陽光普照下嘅Beach Road面對大平洋揸車直情係一種享受.

咁茂盛同色彩鮮豔嘅樹, 香港應該揾唔到.

四圍兜之下經過牛牛牧場, 好多隻乳牛開心地食緊草.

山上草原有綿羊, 眼定定咁望住我.

跟住去活海鮮專賣店睇睇有無野買黎今晚玩煮飯仔, 呢度游水龍蝦海魚同活青口樣樣齊, 售價比超級市場昂貴, 活青口每kg NZD6.99, New World Supermarket 衹賣 NZD3.99/kg, 所以我地最後都係去New World買餸喇.

是晚餐酒 - 紐西蘭地產得4粒半星大獎嘅白酒Main Divide Riesling(NZD15.99), 香甜冰凍透心涼.

Fresh Green Salad(NZD5.79), 地產蔬菜新鮮爽脆, 清爽開胃.

(RW Loose Bread Roll)NZD2.07, 放入大焗爐焗番暖就零舍好味.

芝士橄欖蕃茄乾沙律(RW Guzzaedi Mediterranean Sea Salad)NZD5.86, 伴白酒無懈可擊.

紐西蘭煙燻醋漬青口(Smoked Marinated Mussels)NZD5.25, 入口軟熟酸酸地, 送酒小食.

紐西蘭地產T骨牛扒406g(NZD8.52), 雪花紋密佈, 好優質.

煎紐西蘭地產T骨牛扒, 先煎後焗, 火喉恰到好處, 入口肉質鬆化, 肉汁豐盈肉味濃郁, 地產地食零舍滋味, 與別不同.

紐西蘭地產活青口1.225kgs(NZD4.89), 新鮮活青口喺專櫃內養住, 自已用拑親自揀選, 隻隻生猛, 超級平靚正.

意式蕃茄醬煮紐西蘭活青口(Boiled New Zealand Live Mussels with Latina Classic Sauce), 優質無污染嘅紐西蘭活青口軟滑鮮甜, 意式蕃茄醬汁能帶出海洋鮮味, 蘸麵包更加天下無敵.

食完飯出小花園賞吓月.

是晚生果 - 紐西蘭紅梨(Pear D Anjou)NZD1.67, 爽口唔太甜, 如果腍D就仲正.

瀏覽人數 :