紐西蘭南島10天自駕遊 (Day 7)

Day 7 : [Lake Tekapo - Mt. John - 基督城(Christchurch) - Kaikoura - Hislops Cafe情人節海鮮晚餐] 行車 406公里

朝早起身陽光普照, 行去餐廳食早餐, 平靜嘅湖面像鏡一般倒影著酒店同餐廳, 構成令人舒服夾醒神嘅一副圖畫.

呢間新開無幾耐嘅酒店原來尋日接待左好多旅行團, 因餐廳不大, 我地要等拾幾分鍾先有位食早餐.

自助早餐尚算OK, 我首選都係烤磨菇同蕃茄加奇異果汁, 多士配自家制果醬同新鮮蜂膠蜜都好有真正原味, 最後整多碗粥就飽飽啦.

 

今日超長途車, 第一站先去位於山上嘅夜晚觀星絕佳聖地Mt. John, 好多座口徑1.8M全紐西蘭最大嘅MOA天文望遠鏡.

喺Mt. John居高臨下, 空氣清新, 視野廣闊, 四週一覽無遺, 喺欣賞大片平原同南阿爾卑斯群山嘅一流地點.

山下有幾隻馬喺度做緊晨操.

整個Tekapo湖同小鎮都盡入眼廉.

沿8號公路北上向基督城出發, 轉79號公路行約粒半鐘後到達一個小鎮Geraldine.

落車行吓抖吓, 肉檔同戲院建築得好特式.

喺Geraldine嘅Fresh Choice超級市場買左D車厘茄同Manuka蜜糖.

跟住行吓附近餐廳揾野食, 全部Hot Meal都要11點後先有得供應, 最後喺Oaks Cafe 買野食.

喺Oaks Cafe 叫左一份南瓜湯(NZD6.5)加一隻熱狗(NZD7), 味道都OK架.

餐廳隔離有幾間店鋪賣D地道野, 我地都喺呢間Prenzel買左Manuka蜜燻粗鹽(Manuka Smoked Coarse Salt)NZD10.5

沿1號公路行2小時後到達基督城(Christchurch), 原本Set左GPS去嘅日式拉麵店食晏, 點知經2011年地震後已經無左, 左兜右兜, 兜黎兜去半粒鐘之後停低車行吓揾野食.

行到Riccarton Road見到一間St. Pierre's壽司店, 一於食壽司作午餐啦.

St. Pierre's壽司店以自助形式運作, 即場新鮮制作, 揀完先比錢.

炸蟹棒(NZD3.8), 魚肉蟹棒蘸甜酸醬, 開胃小食.

今日嘅推介壽司盒(NZD9.5), 豐富又好味.

Jumbo Salmon Lover(NZD10.9), 三文魚壽司配三文魚牛油果卷物, 同樣新鮮味美.

2011年基督城地震損毀左好多建築物, 呢間幸存嘅旁邊都要做鞏固工程.

攞車途中見到有個賣牛奶嘅指示牌, 行入去睇睇, 原來喺一間好隱蔽嘅中式雜貨店, 心情大靚之下買左可能係全紐西蘭衹有呢度先買到, 用鹹水草綁住嘅廣東白菜同香港制造嘅出前一丁麵, 作為我地明天嘅早餐材料.

經過一個比較大型嘅購物中心, 商店,食肆,超級市場樣樣齊, 一於泊低車入去超級市場買野.

買左杯凍Mocha飲, 透心涼也.

喺Countdown超級市場買左D凍火腿,凍青口同啤梨, 然後離開基督城向Kaikoura出發.

粒半鐘後到達一個非常細嘅小鎮, 加加油又順便抖抖.

飲完支果汁又再出發.

一粒鐘後終於到達Kaikoura, 先到酒店The Fairways check-in.

我地住 3號嘅 Apartment.

間屋好大, 有客廳,飯廳,同設備齊全嘅開放式廚房, 燒真炭嘅暖爐真係好少見, 冬天黎先可以用.

仲有户外小型花園同燒烤爐, 可以買野喺度整BBQ大餐.

睡房闊大光猛, 架車就泊喺出邊, 直情係我地嘅Dream House.

依家晚上6點鐘, 一於出市中心大街兜兜, i Site就關左門.

再到明天出海觀鯨嘅集合地點Beach Road睇睇.

Beach Road旁嘅Whaleway Railway Station, 了無人跡, 呢兩日都未見過火車行.

Set 左 GPS去今晚食飯嘅餐廳, 沿途見到有間食店, 原來以做外賣熟食為主, 有龍蝦賣架.

尚有時間可以行吓New World超級市場, 買左枝紐西蘭得獎嘅Riesling白酒同D送酒前菜小食今晚做情人節宵夜.

7:30到達今晚嘅餐廳Hislops Cafe, 餐廳環境非常優美, 我地架車仲可以泊喺門外, 真方便.

Hislops Cafe得獎無數, 選用優質有機地產新鮮食材, 今日情人節餐廳己經爆滿, 好在我地出發前喺香港己經訂左位.

明天嘜車程, 今晚情人節可以飲吓紐西蘭嘅餐酒啦.
Brut Cuvee Lindauer (NZD9.5), 氣泡細密, Lindauer果香味清新唔太甜, 口感清爽. Urlar Pinot Gris(NZD12), 口感幼滑, 清甜易入喉.

Seafood Chowder(NZD16.5)Chunky Fish, Mussels, Smoked Fish and Seasonal Seafood in a Tasty Seafood Base with Mixed Vegetables - 周打海鮮湯材料豐富, 青口魚蝦蟹肉樣樣齊, 海鮮湯底口感厚身軟滑, 鮮味無比, 係紐西蘭飲過最正嘅周打海鮮湯, 人間美味.

Seafood Platter(NZD75)Kaikoura Freshwater Koura with a selection of Mussels, Whitebait, Fish & Other Seafood Accompanied by Hislops Wholemeal Bread and Organic Potato - 兩人份量嘅海鮮拼盤超級豐富, 燒淡水龍蝦香口美味, 紐西蘭青口配椰子香茅淡青咖哩汁, 入口軟滑鮮香惹味, 煎白飯魚餅香軟夠新奇, 煙三文魚爽滑鮮味, 烤白身魚柳新鮮軟熟啖啖肉, 炸鮮魷蘸他他醬香脆滋味, 八爪魚薯仔沙律開胃好味, 炸海澡球外脆內軟夠特別, 精釆出色嘅演繹, 超級大大大滿足.

食完大滿足嘅情人節海鮮晚餐巳經九點幾開始黃昏日落.

食飽飽返酒店休息.

今晚天上好多星星, 同Lake Tekapo時一樣咁滿天星斗, 有幾經粒仲特別光亮, 我對星座所知有限, 但都可以感覺到構成一幅幅星座圖案時嘅壯觀, 大開眼界, 今次終於對到焦同影到相啦.

睇完星星入房沖涼, 是晚生果係今早喺Geraldine買嘅紐西蘭地產車厘茄(Tomato Sweetarino)NZD3.99, 香甜多汁超優質.


瀏覽人數 :