2011年9月12日 星期一

杭州中秋4天遊 (Day 4)

Day 4 龍井問茶 - 西湖三堤 - 香港








今日包左架車半日自由行(RMB70/小時), 食完自助早餐就出發, 首站先到西湖十景之一"龍井問茶", 位於龍井路上. 半粒鍾就到.






"龍井問茶"內嘅老龍井泉乃必到景點, 屬杭州西湖三大名泉之一, 井水泡茶甘爽可口. 除此以外, 呢度附近仲種滿桂花樹, 聞到陣陣嘅桂花香味.





第2站去"龍井山園"主題公園, 旅遊書推介必賞西湖新十景, 黎到見門口冷清清有D唔對路, 而且仲未開門, 速閃走人啦. 其實司機都覺得好奇怪我地會黎呢度, 有時真係唔可以信晒本書.

  



問司機有否片山茶園嘅地方睇睇, 司機就車我地黎呢度"十里琅璫". 沿斜路行上十零分鐘到達一個小涼亭, 空氣份外清爽, 成個人醒哂.





正宗獅峰龍井茶園係坐落於獅峰山下.





呢度自然環境獨特, 氣候温和濕潤, 雨霧蒙蒙, 種出中國十大名茶之首"獅峰龍井". 可以見到真正依山而種嘅龍井茶園, 確係非常壯觀, 今次真係不枉此行.




跟住去"法雲安縵"酒店睇睇, 呢度遠離繁喧, 房間均為私密庭園, 可以感受真正嘅幽靜.





 
時間尚早之下, 決定再到西湖遊覽, 西湖楊公堤乃西湖三堤之一, "郭莊"內嘅景蘇閣, 係觀賞蘇堤嘅最佳地點.





西湖十景"蘇堤春曉"指在清晨時份湖上瀰漫着煙霧嘅意境, 蘇堤又叫蘇公堤, 亦係西湖三堤之一, 全長2.8公里, 共有6座橋樑.






莊園內雖然稍為破舊, 但仍然保留住一份優雅.






 
之後再到西湖三堤之"白堤"一行.






滿報楊柳樹下嘅白堤, 亦係西湖三堤最古老一段, 我覺得係全西湖最舒服好行嘅一段.





西湖十景"斷橋殘雪", 其實要喺冬天半績雪時先見到嘅景象. 今日再黎同尋日人山人海嘅景況真有天壤之别, 呢度亦係白蛇傳著名場景.






尾站喺杭州馳名麵食店"奎元館"午餐, 奎元館創建於清同治六年(1862年), 主打徵州麵食.






店內空間寬敞, 環境光猛.






奎元館 - 鹽蘸牛筋(RMB22), 牛筋煮得香腍滑但有咬勁, 蘸香口淮鹽伴食, 一流.





奎元館 - 糖醋蓮藕苗(RMB18), 蓮藕苗爽脆多汁, 唯糖醋味過份濃烈.






奎元館 - 蝦仁炸醬伴麵(RMB18), 炸醬加入香濃麵醬, 惹味非常, 滋味無窮.

    




奎元館 - 蝦爆鱔麵(RMB35), 招牌麵食, 蝦仁爽滑, 黃鱔爆香再煮湯, 湯鮮濃有膠質, 麵爽滑, 係呢度嘅必食名物.






食飽飽後沿湖濱路慢步返酒店, 作為杭州4日行程嘅終結.







酒店出杭州機場, 衹須40分鐘(RMB130).


 




杭州機場內衹得一間餐廳SPR Coffee.







SPR Coffee - 紅燒牛肉飯(RMB93), 味道一般.






  港龍飛機餐 - 菜飯比通粉好吃.





戰利品


瀏覽人數 :

無料カウンター

2 則留言:

  1. 你的杭州中秋 4 天遊很吸引,相片拍攝得很美又精彩,加上我將在月尾到杭州及蘇州旅遊,可以先了解一下環境。我在最後 2 天也是住西湖傍嘅Sofitel,見你的第二日行程報左個 local tour 去西溪濕地同梅家塢在酒店出發,請問你在那裹報名及收費幾多 ?值唔值得去呢 ?

    回覆刪除
  2. 喺酒店trouist desk 報, 每位RMB165.00, 溪濕地同梅家塢都係到杭州必遊嘅景點. 當然值得去啦. 喺杭州打啲有D困難, 報 local tour交通安排上比較方便.

    回覆刪除

Related Posts Plugin for WordPress, Blogger...