2012元旦行大運

今日元旦日實行黎個行大運, 先到尖沙咀花之家食日本新年雜煮, 然後去尖沙咀碼頭睇龍獅節大巡遊, 跟住搭渡海小輪過中環, 再飛的去赤柱, 最後落中環來佬餐館食野, 行完蘭桂坊同SoHo區就喺嘉咸街新景記食魚蛋粉, 宵夜就喺自家製XO醬煎餐肉丁麵, 相當多姿多釆.

位於尖沙咀嘅花之家係我地近排喜愛嘅日本餐廳, 今日元旦日佢地仲有傳統嘅新年雜煮.

佈置得好有新年氣氛.

花之家 - 清爽嘅沙律作前菜.

花之家 - 雜錦刺身定食($130), 各樣都非常新鮮甜美, 伴生磨 Wasabi, 超正.

花之家 - 新年雜煮有依達卷加湯年糕($88), 好傳統嘅元旦祝定食.

花之家 - 咖啡同生果都一絲不苟

跟住去尖沙咀碼頭, 途經廣東道見到有龍獅節大巡遊, 好長嘅舞龍加好多隻獅子在舞動, 大開眼介.

搭渡海小輪過中環, 再飛的去赤柱, 行吓赤柱市集.

赤柱大街嘅餐廳可以擺枱喺行人路上, 非常熱鬧.

美利樓同皇后碼頭都屬於香港曆史文化遺產.

皇后碼頭由中環搬到赤柱, 成為赤柱公眾碼頭.

登上美利樓, 觀景開揚, 令人心曠神怡.

最後落番中環, 原來中環都有舞龍睇, 衹係細隻左D.

跟住要去醫吓肚, 因為鏞記燒鵝未出爐, 一樂又賣晒燒鵝, 所以就到位於中環鏞記旁嘅來佬餐館.

來佬餐館 - 凍檸樂($19).

來佬餐館 - 脆皮乳鴿($98), 外皮香脆, 肉嫩有汁, 同太平館有得揮, 好滋味.

來佬餐館 - 窩蛋手切免治牛肉鮮茄菜粒飯($98), 材料豐富, 牛肉味鮮香有口感, 勁正斗.

食飽飽後就喺中環蘭桂坊同SoHo區一帶散吓步.

最後行去嘉咸街, 喺新景記門口見到嘅炸魚片非常吸引, 入內試吓味先.

新景記 - 魚蛋魚片河($21), 魚蛋魚片都係每日用人手新鮮製造, 魚味濃郁, 軟腍鮮香, 極之出式.

新景記 - 四寶丸($28), 每粒丸子都食到本身原來嘅味道, 全無添加, 豐富好味又優質.

元旦宵夜 - 自家製XO醬煎餐肉麵, Yummy 好滋味. 

瀏覽人數 :