Caprice - 米芝蓮法國菜

貴為全港唯一一間米芝蓮3星法國餐廳, 位於中環四季酒店內嘅Caprice, 訂位食Lunch要早幾個星期. 襯住今日大日子一於去試吓, 無論餐廳環境,食物質素同服務都名附其實米芝蓮3星級數, 比起半島嘅Gaddis更勝一籌, 價錢同級數都無懈可擊.

餐廳環境典雅舒服, 超高樓底, 水晶吊燈, 落地玻璃, 無敵海景, 無懈可擊.

Weekend Lunch Menu 中英文對照好細心, 我地揀每位 $520 Set Lunch, 3個Courses Lunch 連一杯法國餐酒.

一紅一白, 同樣好飲易入喉.

餐前小食 - 入口感覺似係肉鬆脆果.

牛油分有鹽同無鹽.

法國麥包加酥皮芝麻卷, 前者比較硬, 後者就香軟酥化.

法式粟米濃湯伴雞肝燉蛋小茴 - 粟米湯入口香甜滑溜無渣, 底下嘅雞肝燉蛋甘香軟熟, 味道層次豐富.

煎茄子炒蝸牛配雞肉釀羊肚菌 - 賣相精美如藝術品, 口感同味道都超豐富, 由軟熟到爽口, 清淡到濃郁,  非常有層次感, 精采.

法式燴和牛肩大蒜慕絲脆薯片紅酒汁 - 慢煮和牛肩腍滑軟綿入味, 肉味香濃, 頂層薯片超香脆, 中層大蒜慕絲同底層煮大蒜嘅香味可平衡和牛肩肉嘅肥膩感覺, 配合得天衣無縫.

法式燴鴨腿伴亞枝竹香蒜薯仔脆片香草汁- 燴鴨腿肉香腍嫩, 有食野味嘅風味, 伴亞枝竹醬或法國香草食都同樣出色, 美味之極.

Petit Four - 精緻香甜嘅迷你Macaroon,  軟綿綿嘅朱古力綿花糖, 香濃嘅軟心朱古力, 幾種不同的口感頗為豐富.

Dessert - 甜品成盆咁放喺你面前任揀, 款式非常吸引. 每人可選3款, 2個人就可以唔洗諗一次過試晒啦, 真開心.

桃味Macaroon外脆內軟腍, 芒果忌廉泡芙夠香甜, 朱古力Opera香濃又軟熟.

杏仁菠蘿撻口感豐富, 軟糯煙韌嘅椰絲綿花糖, 栗子蛋糕軟熟清新.

糖果 - 杏仁蛋糕, 軟心朱古力同拖肥糖, 送咖啡一流.

Cappuccino - 花紋拉得好精緻, 香濃滑, 沿四週杯邊飲下, 可以每啖嘅味道都有所不同, 神奇夾精釆, 非常完美嘅一餐.

瀏覽人數 :