志蓮靜苑(鬧市中的靜土)

位於黃大仙鑽石山嘅志蓮靜苑建成已久, 今日放假下午諗住食得清淡D就去佢南蓮苑池內嘅志蓮素齋食晏, 志蓮靜苑嘅環境非常寧靜同舒適, 建築群更加莊嚴肅穆, 直情係鬧市中嘅靜土.  志蓮素齋嘅優質出品就更令人有清新嘅感覺, 回味無窮.

\

松樹加盆景, 同蓮花池都令靜苑環境更見優美.

沿南蓮苑池步行, 到達龍門樓內嘅志蓮素齋.

入到志蓮素齋, 安排我地坐窗口位, 外望瀑布水廉, 環境靚絕.

叫左一位五福臨門套餐, 五餸一湯加粥/飯同生果(每位$120), 今日嘅明火例湯係西洋菜南北杏腰果湯, 火喉十足, 腰果入口溶化, 香甜好飲.

五彩薯條 - 蕃茄汁底似羅宋湯, 能帶出蔬菜原有味道, 豆角爽脆, 薯仔味勁濃郁.

炸釀茄子 - 外脆內軟, 香脆可口.

西洋菜卷 - 口感豐富, 清爽味美.

煎蘿蔔糕($28) - 外層香口, 內有清甜蘿蔔同爽口蔬菜粒, 優質出品.

金絲扒時蔬 - 金菇素菌汁同爽脆嘅生菜, 非常正斗.

醬伴芙蓉 - 雜菌醬扒腐皮, 醬汁帶濃香菌味, 腐皮香滑充滿豆香, 好滋味.

白粥 - 香滑軟綿, 白粥中嘅極品.

黃耳珍菌羹($45) - 黃耳同其他珍菌各有香味同口感, 互相配合, 極之味美.

菌醬松花菌蒸飯($60) - 飯粒有米香, 松花菌香而爽口, 菌醬濃郁加清新嘅薑絲用黎平衡味道, 精華盡在飯粒中, 天下無敵嘅滋味, 好食到無朋友.

生果 - 火龍果加蜜瓜, 夠清甜. 

食完晏行吓南蓮苑池, 見到有錦鯉池, 原來呢個衹係一小部份.

再行落去見到整個巨形錦鯉池, 水清澈見底, 水面波平如鏡有倒影, 極寧靜同優美.

錦鯉在池中悠嫻暢泳.

金碧輝煌嘅圓滿閣同樣係南蓮苑池主要嘅景點.

瀏覽人數 :