天龍軒 - 102天際餐廳

最近位於九龍最高大廈ICC已經成為最熱新地標, 喺Ritz Carlton酒店嘅102樓中西餐廳更加係長龍店, Walk-in 一定冇位, 預訂都要2~3個月先輪到. 今晚嘅中餐廳天龍軒都係個幾月前所訂嘅先有位. 餐廳環境一流, 服務態度更加友善同細心, 食物材料新鮮, 出品水準高, 價錢其實唔算太貴, 可以encore, 預訂左星期六再黎飲茶(係3個月後嘅星期六先有位, 真勁!).

樓底夠高令人好舒服, 觀景視野寬闊, 居高臨下, 落地玻璃窗俯瞰西九龍景色更加無敵.

撞正今日3號風球(海馬), 見到風雲變色, 又有時大時細嘅雨浪, 令有一番景象.

今日决定要慢食, 叫兩杯Cocktail慢慢嘆吓先.

Gunner($78) - Ginger Beer + Ginger Ale + Rose Water, 清新醒神.

   

Spicy Orange($98) - Vodka + 辣椒汁 + 橙汁 + 薑汁 , 好特別嘅味道, 仲好夠濃烈.

  

賣相精緻嘅鹵水豆腐, 好睇又好食.

  

諗住食叫D餐前小食送吓酒, 原來份量都唔少, 每款有6件. 炸大蝦多士($68), 大蝦鮮夾爽, 多士香酥唔肥膩, 送酒極品. 

煎燻素鵝($58) - 刀功幼細, 素餡料清新爽口, 腐皮香脆, 口感豐富, 高水準.

西班牙黑豚叉燒($180) - 招牌菜式, 黑豚肉味須然冇想象中咁濃, 肉質嫩滑中帶點口感, 半肥瘦脂肪比例適中, 香軟味美.

   

酥炸帶子伴芒果汁($68) - 皮薄香脆, 帶子鮮甜軟熟, 新鮮芒果打成醬汁超香甜.

 

蟹肉蓮藕餅($58) - 蓮藕片夾住新鮮蟹肉同洋蔥再煎, 與釀蟹蓋的饀料差不多, 同樣香口好味.

蜜餞火腿鴿甫($238) - 新鮮鴿甫香嫩軟熟, 蘭度清新爽脆, 蜜餞火腿鹹香中帶甜, 將兩道菜配成一道又幾配合, 視覺味覺口感都非常豐富, 超好味.

干炒斑片河($238) - 河粉炒得香口夠獲氣, 斑片鮮嫩軟熟好味, 超高質素.

天龍甜品薈萃($168) - 流沙煎堆仔(皮香軟, 流沙奶皇香甜唔膩), 紅豆椰汁糕(軟綿綿唔太甜, 好味道), 黑松露奶凍(奶凍香滑, 原片黑松露味道香濃獨特, 一試難忘). 店員當晚才知我地今日係結婚24週年, 好有心思咁喺甜品碟上用朱古力寫上祝福字句, 真窩心.

 

雨過天清後, 俯瞰西九龍夜景, 非常耀目, 真係好吸引.




瀏覽人數 :