日本京都紅葉21天自駕遊(2024) - Day 9 (海の京都-伊根町)

Day 9 :  Mercure Kyoto Miyazu Resort & Spa(自助早餐) - 天橋立傘松公園 - 丹後由良(京都丹後鐵道海上列車)  - 天橋立海鮮町(漁師午餐) - 伊根灣賞景觀光船 - 道の駅(舟屋之里伊根) - 伊根町散策 - 與謝莊舟屋 WATER FRONT INN Yosasou(漁師晚餐)

Day 9 : 今日行程繼續係海の京都旅程, 天橋立傘松公園地方細細好快遊覽完, 趁住今日藍天白雲再去睇京丹後鐵道海上列車, 跟住唔覺意路過見到銀杏隧道真係小確幸. 下晝去到伊根町第一時間就係去坐觀光船, 從海上角度去欣賞伊根灣同舟屋相當精彩, 可惜好多人在船頂餵飼海鷗, 太多海鷗在頭上飛翔令到我中頭獎, 黃昏前泊低車到海邊散步, 遊人散去的伊根町非常寧靜, 行得好舒服, 黃昏時分光線格外迷人, 晚上嘅星空夜景更加係無敵絕境. 食嘢方面在天橋立海鮮町嘅漁師午餐同蝦意粉都非常好味, 價廉物美, 與謝莊舟屋嘅漁師晚餐就更加精彩, 刺身燒魚煮魚仲有鯛魚姿造, 超肥美嘅大拖羅同油甘魚, 更加厲害嘅就係有埋舞鶴蝦刺身, 演繹出漁師嘅精髓, 人間嘅滋味. 今日入住嘅與謝莊舟屋非常正斗, 出發前已鎖定人生在伊根町必需要入住的民宿, 環境同食物都係超級無敵, 超開心滿足的一日旅程.

酒店早餐餐廳, 尚未開門已有人排隊, 有了昨晚經驗我地都早D到達.

酒店自助早餐 - 實在太豐富.

早餐後Check out, 第一站到府中駅, 是前往天橋立傘松公園的纜車站.

傘松公園登山纜車, 來回每人收費800円.

登山纜車沿途景色.

5分鐘到達山頂纜車站.

天橋立傘松公園山頂地方比天橋立View Land細得多. 

二樓Ama Terrace是餐飲與紀念品兼具的複合式空間，可以眺望到天橋立沙洲的風景 .

傘松公園展望台 - 地板舖著玻璃的天空甲板也能觀賞絕美景, 同樣可以有"昇龍觀"角度.

很快便行完, 乘搭登山吊椅落山, 如果時間不足可以衹到天橋立View Land.

趁住今日陽光普照, 藍天白雲, 再到丹後由良主要景點, 是京都丹後鐵道經過由良川橋時, 彷似電影千與千尋乘坐的海上列車, 遇上特別觀光列車就更加難得.

一路追蹤著京都丹後鐵道通過由良川橋直達對面岸的小村落.

午餐時間到宮津市的天橋立海鮮町.

入門口已經被好多活生生的松葉蟹所吸引, 餐廳還提供活蟹料理, 睇到心郁郁.

我們選擇在レストラン 漁連買午餐吃, 圖文並茂, 先購票後取餐.

漁師御膳(2,800円) - 以當日新鮮魚獲, 製作刺身, 燒魚, 醬油煮魚等料理, 充滿魚鮮味, 正斗.

濃蝦湯蝦仁意粉(1,000円) - 蝦仁鮮甜爽彈, 勁香濃嘅蝦醬汁掛上每條意粉, 啖啖濃郁滋味.

原本駕車到伊根町遊覽, 途中在宮津市的須津第2公園看見很多盛開的銀杏樹群, 當然要駛入去銀杏隧道睇睇.

逆光下的銀杏樹份外優美.

尾站到伊根町, 參加了伊根灣賞景觀光船, 在紀念品店等候出發.

 伊根灣賞景觀光船, 船費每人1,200円.

有超多海鷗作伴遊, 非常熱鬧.

觀光船繞行京都北部丹後半島伊根灣, 伊根灣周圍舟屋林立, 可以從海上欣賞堪稱日本原始風景的優美景觀.

號稱神宿之島的"青島", 這座有"神宿之島"之稱的無人島堪稱是天然的防波堤, 使海面平穩無浪.

從海上觀賞構造特殊的"舟屋群", 1樓是直通大海的置船場, 2樓為居住空間. 這座保留著江戶後期至昭和初期所建的舟屋的街道. 約25分鐘船程便回航.

駕車到道の駅舟屋之里伊根, 可以從高角度遠眺伊根灣與舟屋群.

泊車到與謝莊舟屋酒店停車場, 然後步行遊覽伊根町.

洋溢著日本原始風景的美麗海濱小鎮.

海の祗園祭的祭禮船艇庫.

黃昏前先到與謝莊舟屋酒店Check-in.

與謝莊 舟屋 WATER FRONT INN Yosasou, 和式舟屋房間非常寬敞, 270度窗景視野超級廣闊, 伊根灣與舟屋群一覽無遺, 地點位置就在小碼頭旁, 1泊2食連泊車收33,000円, 早晚餐勁正斗, 性價比超高, 出發前在網路上看見已一早決定要入住, 也不枉我們用很多時間和耐性在出發前預訂這酒店.

黃昏時分再步出海邊散策, 遊人巳散的伊根町寧靜悠閒, 非常舒適, 靜待magic hour.

Magic hour 後有燈火的舟屋別具特色.

小碼頭就係伊根町嘅主要打卡位, 我地就係入住左邊最後的與謝莊舟屋二樓向海的和式房間.

與謝莊舟屋 - 返回酒店吃晚餐.

今日的漁師晚餐 - 刺身, 燒魚, 煮魚, 以三款不同的鮮魚造出非常美味的料理, 以為已經上完菜, 點知好戲在後頭.

鯛魚姿造刺身拼盤 - 賣相很震撼吸睛, 除了鯛魚, 還有肥美甘香嘅大拖羅, 油甘魚和炙燒鰹魚, 精釆演繹出人間美味.

舞鶴蝦刺身 - 地產地消, 只在舞鶴市出產的土蝦, 口感細緻, 味道甘甜, 勁正斗.

晚餐後就係欣賞伊根町舟屋和星空的最佳時間, 漫天星光真係無敵嘅絕景.

與謝莊舟屋的日式榻榻米床墊, 開心滿足大覺瞓.